Azərbaycan, Bakı, 27 sentyabr /Trend, müxbir A.Axundov/
Azərbaycan Ümumdünya Ticarət Təşkilatına (ÜTT) üzvlüklə bağlı çoxtərəfli danışıqlar çərçivəsində yaxın günlərdə kənd təsərrüfatının vəziyyəti haqqında yenilənmiş cədvəli katibliyə təqdim edəcək.
Trend-in məlumatına görə, bu barədə cümə axşamı jurnalistlərə Azərbaycanın xarici işlər nazirinin müavini Mahmud Məmmədquliyev məlumat verib.
"Biz son üç ilin məlumatlarından istifadə edərək hər dəfə bu cədvəli yeniləyirik. Ölkədə kənd təsərrüfatının vəziyyəti haqqında kifayət qədər geniş arayış hazırlanıb", - Məmmədquliyev bildirib.
Onun sözlərinə görə, cədvəl ABŞ və başqa ölkələrin sorğusu üzrə yenilənib.
"Orada bizim ölkədə kənd təsərrüfatına daxili dəstəyin maksimum səviyyəsi ilə bağlı mövqeyimiz, niyyətlərimiz əksini tapıb. Bu arayış Azərbaycanda kənd təsərrüfatının vəziyyəti haqqında kifayət qədər obyektiv və tam şəkli əks etdirir", - Məmmədquliyev deyib.
2007-ci il üzrə məlumata görə, Azərbaycanın kənd təsərrüfatında subsidiyalaşdırmanın həcmi əmtəə məhsulları sektorunun 27 faizi həcmində qiymətləndirilib. Müqayisə üçün qeyd etmək lazımdır ki, Avropa İttifaqında o, orta hesabla 24 faiz, İsveçrədə 63 faiz, Yaponiyada 48 faiz, Cənubi Koreyada və Türkiyədə 52 faiz təşkil edir. Rəqəmlər İqtisadi Əməkdaşlıq və İnkişaf Təşkilatı (OECD) tərəfindən təsdiqlənib.