Azərbaycan, Bakı, 30 oktyabr /Trend, müxbir İ.Xəlilova/
Bu gün Azərbaycan hökuməti Ümumdünya Ticarət Təşkilatının (ÜTT) Katibliyinə "Factual Summary" icmal hesabatını sənədin sonradan Azərbaycan üzrə işçi qrupunun üzvləri arasında yayılması üçün təqdim etmək fikrindədir. Bu barədə çərşənbə axşamı Trend-ə Azərbaycan xarici işlər nazirinin müavini Mahmud Məmmədquliyev məlumat verib.
"ÜTT Katibliyi ötən cümə günü həmin hesabatı Azərbaycan tərəfinə baxılmaq üçün təqdim etmişdi. Onun qaytarılma vaxtı oktyabrın 30-na təyin edilmişdi", - nazir müavini deyib.
Adətən Azərbaycanın üzv ölkələrə yeni təklifləri üzrə bu hesabata cavab verilir və sualların növbəti prosedurundan sonra əlavələr olunur. Sənəd özündə Azərbaycanın ÜTT-yə daxil olmasında görülən işləri ehtiva edir.
Bundan əvvəl Azərbaycan hökuməti Katibliyə Ümumdünya Ticarət Təşkilatına üzv ölkələrin suallarına cavabları təqdim edib ki, Katiblik də bu cavablar əsasında "Factual Summary" icmal hesabatını hazırlayıb.
"Bu tədbir dekabrın əvvəllində keçirilməsi planlaşdırılan çoxtərəfli danışıqların növbəti mərhələsinə hazırlıq çərçivəsində keçirilir. İlkin danışqıların noyabrın sonuncu həftəsinə təyin edilməsinə baxmayaraq, ABŞ-ın xahişi ilə bu, dekabrın birinci həftəsinə keçirilib", - Məmmədquliyev bildirib.