Azərbaycan, Bakı, 16 noyabr /Trend, müxbir C.Nəsibova/
Bakı Fond Birjasında (BFB) qiymətli kağızların listinq qaydalarına dəyişikliklər ediləcək. Trend-in məlumatına görə, bu barədə cümə günü jurnalistlərə BFB-nin idarə heyətinin sədr müavini Vüqar Namazov bildirib.
"Hazırda listinq qaydalarının sadələşdirilməsi, habelə müəyyən dəqiqləşdirmələr üzrə işlər aparılır", - Namazov qeyd edib.
Onun sözlərinə görə, həmçinin şirkətlərin birjada listinqə qarşı motivasiyasının artırılmasına yönəldiləcək bir sıra tədbirlərin keçirilməsi planlaşdırılır.
Qeyd edək ki, Azərbaycanda listinq, delistinq və qiymətli kağızların BFB-də alqı-satqıya buraxılması qaydaları 2009-cu il avqustun 3-dən fəaliyyət göstərir.