Azərbaycan, Bakı, 19 noyabr /Trend, müxbir A.Axundov/
Azərbaycanda lizinq xidmətlərinə tələbat təklifi ən azı iki dəfə üstələyir. Bu barədə bazar ertəsi Trend-ə Azərbaycan Lizinq Şirkətləri Assosiasiyasının sədri Elçin Əhmədov deyib.
"Bu il lizinq bazarı üçün əvvəlki il kimi olub. Portfelin nəzərəçarpacaq dərəcədə artması müşahidə edilməyib, lakin azalma da olmayıb. Biz praktiki olaraq eyni səviyyədə - təqribən 200 milyon manat səviyyəsindəyik. Bu, pis amil deyil, lakin portfelin artmasını istərdik. Bu, olduqca perspektivli sahədir, belə ki, bunlar sahibkarları maraqlandıran xidmətlərdir. Tələbat şirkətlərin təklif edə biləcəyindən xeyli çoxdur. Bəziləri maliyyə resurslarına ehtiyac duyurlar, lizinq şirkətlərinin resursları cəlb etməkdə çətinlik çəkdikləri vaxtlar olur", - Əhmədov qeyd edib.
Onun sözlərinə görə, qanunvericilikdə lizinq şirkətlərinin inkişafını ləngidən müəyyən problemlər var.
"Fikrimcə, ilk növbədə, bu problemləri həll etmək lazımdır ki, bu da portfel və oyunçuların sayının artmasına səbəb olacaq. Hazırda lizinq şirkətləri yaradılır, ancaq bu şirkətlər kiçikdirlər, bazarda onların xüsusi çəkisi yoxdur. Biz, həmçinin bir sıra assosiasiyaları genişləndirdik və gələcəyə nikbinliklə baxırıq. Buna baxmayaraq, lizinq sahəsinin daha fəal dəstəklənməsini istərdik", - Əhmədov deyib.
