Azərbaycan, Bakı, 19 noyabr /Trend, müxbir A.Axundov/
Azərbaycanın bank sektorunda gözlənilən dəyişikliklər lizinq şirkətlərinin işinə ciddi təsir etməyəcək. Bunu bazar ertəsi Trend-ə Azərbaycan Lizinq Şirkətləri Assosiasiyasının sədri və "Joint Leasing" şirkətinin baş direktoru Elçin Əhmədov bildirib.
Xatırladaq ki, Mərkəzi Bankın (AMB) İdarə Heyətinin 25 iyul 2012-ci il tarixli qərarı ilə fəaliyyətdə olan bankların məcmu kapitalının, habelə yeni yaradılan banklar üçün nizamnamə kapitalının minimum miqdarı 10 milyon manatdan 50 milyon manatadək artırılıb. Fəaliyyətdə olan banklar üçün bu qərar 1 yanvar 2014-cü ildən qüvvəyə minir.
"Lizinq şirkətləri hazırda yeni tələblərə cavab verən və ya artıq bu tələbləri yerinə yetirdiklərini elan edən bankların nəzdində yaradılıb. Bununla əlaqədar olaraq, düşünmürəm ki, bu, lizinq bazarının oyunçularının sayına təsir göstərəcək", - Əhmədov qeyd edib.
Lizinq şirkətlərinin təklif etdiyi faiz dərəcələrinə gəlincə, Əhmədov deyib ki, bu faiz dərəcələri xarici və daxili bazarlardakı kapitalın dəyərindən asılıdır.
"AMB və yerli banklar faiz dərəcələrini müvafiq olaraq azaltmağa çalışdıqlarını elan edirlər. Lizinq sektoru bank resurslarından istifadə edən sahələrdən biri olduğuna görə, fikrimcə, biz də bu faiz dərəcələrini ya mövcud səviyyədə saxlamağa, ya da imkan olduqca onları azaltmağa çalışacağıq", - o vurğulayıb.
