Gürcüstan, Tbilisi, 26 noyabr /Trend, müxbir N.Kirsxaliya/
2012-ci ilin yanvar-oktyabr aylarında Azərbaycan Gürcüstanın ən iri xarici ticarət tərəfdaşları arasında tutduğu ikinci yerini saxlayıb. Bu barədə bazar ertəsi Trend-ə Gürcüstanın Statistika İdarəsindən bildiriblər.
Yanvar-oktyabr aylarında iki ölkə arasında ticarət dövriyyəsi 1,048 milyard dollar təşkil edib ki, bu da Gürcüstanın bütün xarici ticarət dövriyyəsinin 12,3 faizini təşkil edir.
Bu məbləğdən Gürcüstan Azərbaycandan 594,3 milyon dollarlıq (bütün idxalın səkkiz faizi) mal və xidmətlər idxal edib. İxracın həcmi isə 523,9 milyon dollar olub ki, bu da bütün ixracın 26 faizini təşkil edib.
Qeyd edək ki, oktyabrda Gürcüstan üçün ən iri ixrac bazarı yenə də Azərbaycan olub.
Gürcüstanın xarici ticarət tərəfdaşları arasında birinci yeri yenə də Türkiyə tutub. Bu ölkə ilə Gürcüstanın ticarət dövriyyəsi 1,293 milyard dollar təşkil edib. Üçüncü yeri 624 milyon dollarla Ukrayna tutur.
Ümumilikdə, 2012-ci ilin yanvar-oktyabr aylarında Gürcüstanın ümumi xarici ticarət dövriyyəsi 8,521 milyarad dollar olub ki, bu da ötən ilin analoji dövründəkindən 15 faiz çoxdur.
Bu həcmdən ixrac 1,985 milyard dollar (14 faiz çox), idxal isə 6,536 milyard dollar (16 faiz çox) təşkil edib.
Bu dövrdə Gürcüstanın xarici ticarətində mənfi saldo 4,551 milyard dollar təşkil edib ki, bu da ölkənin ümumi əmtəə dövriyyəsinin 53 faizini təşkil edir.