Azərbaycan, Bakı, 10 dekabr / Trend, müxbir A.Axundov /
Azərbaycanın Ümumdünya Ticarət Təşkilatına (ÜTT) daxil olması üzrə çoxtərəfli danışıqların iştirakçısı olan ölkələr rəsmi Bakıya öz yeni təkliflərini 2013-cü il yanvarın sonunadək təqdim etməlidirlər. Bu barədə bazar ertəsi Trend-ə Azərbaycanın ÜTT-yə daxil olması üzrə danışıqlar qrupunun rəhbəri, xarici işlər nazirinin müavini Mahmud Məmmədquliyev bildirib.
Ötən həftə Azərbaycanın nümayəndə heyəti Cenevrədə keçirilən ikitərəfli və çoxtərəfli danışıqlarda iştirak edib. Danışıqların gedişində Azərbaycanın mallar və xidmətlər, kənd təsərrüfatına daxili dəstək məsələləri və ölkənin ticarət sistemi üzrə yenilənmiş təklifləri müzakirə edilib.
"İkitərəfli görüşlər ABŞ, Braziliya, Yaponiya, Kanada, Norveç və Avropa İttifaqı ilə keçirildi. Həmişəki kimi, tərəflər Azərbaycandan təklifləri təkrar gözdən keçirməyi, daha çox güzəştlər verməyi xahiş edirlər. Prinsip etibarilə, informasiya və məlumatlarla faydalı mübadilə idi. Kənd təsərrüfatı və ticarət rejimi üzrə çoxtərəfli danışıqlar adi qaydada keçdi, ölkələr suallar verirdi, bəzi məqamları dəqiqləşdirirdi, Azərbaycan nümayəndə heyəti cavab verirdi", - Məmmədquliyev deyib.
Onun sözlərinə görə, danışıqların növbəti XI mərhələsinin tarixi hələ müəyyən edilməyib.
"Biz razılaşdıq ki, yanvarın sonuna kimi çoxtərəfli danışıqlar çərçivəsində ölkələr yazılı formada kənd təsərrüfatı və ticarət rejimi üzrə təklifləri bizə təqdim etsinlər. İkitərəfli danışıqların iştirakçısı olan ölkələrin bir hissəsi artıq yenilənmiş təkliflərini Azərbaycana təqdim ediblər, qalanları yaxın vaxtlarda göndərəcəklər. Biz bu suallar, yeni təkliflər üzərində işləyəcəyik və hər şey hazır olanda, biz sənədləri təqdim edəcəyik, onda da növbəti danışıqların tarixi müəyyən ediləcək", - Məmmədquliyev bildirib.