Azərbaycan, Bakı, 30 mart /Trend, müxbir İ.Xəlilova/
2012-ci ilin yekunları üzrə banklar və neft-qaz sektoru tərəfindən cəlb edilmiş birbaşa dövlət və dövlət tərəfindən zəmanət verilmiş kreditlərin xüsusi çəkisi Azərbaycanın xarici investisiyalarının ümumi həcminin 50,1 faizini təşkil edib. Trend-in məlumatına görə, bu barədə Azərbaycan Mərkəzi Bankının tədiyyə balansında deyilir.
Kredit və investisiyalar şəklində cəlb edilmiş kapital qoyuluşlarının ümumi həcmi 5303,5 milyon dollar olub ki, bu da 2011-cu ilin müvafiq dövr göstəricisindən 45,26 faiz çoxdur.
Tədiyyə balansına əsasən, kreditlərin 35,5 faizi (1245,5 milyon dollar) birbaşa dövlət tərəfindən və beynəlxalq maliyyə və digər təşkilatlar tərəfindən dövlət zəmanəti ilə cəlb olunub.
Zəmanət verilməyən kreditlərin payına 2267,1 milyon dollar (64,5 faiz) düşüb. Zəmanət verilməyən kreditlərin 1556,7 milyon dolları banklar, 710,4 milyon dolları digər müəssisə və şirkətlər tərəfindən cəlb olunub.
Bundan əvvəl cəlb olunmuş kreditlərin ümumi həcmindən 2710,3 milyon dollar qaytarılıb. Qaytarılan kreditlərin 48,4 faizi (1312,5 milyon dollar) bank sistemi, 12,2 faizi (330,5 milyon dollar) dövlət və dövlət zəmanətli kreditlər, 28,5 faizi (772,3 milyon dollar) neft-qaz sektoru, 10,9 faizi (295 milyon dollar) isə digər müəssisə və şirkətlərin payına düşüb.
