Azərbaycan, Bakı, 22 avqust /Trend, müxbir A.Axundov/
Azərbaycan Mərkəzi Bankı (AMB) istehlak kreditlərinin təsnifatını hazırlayıb ki, bu da öz əkisini "Aktivlərin təsnifləşdirilməsi və mümkün zərərlərin ödənilməsi üçün ehtiyatların yaradılması qaydaları"nda tapıb. Bu barədə Trend-ə Mərkəzi Bankdan bildirilib.
Qüvvədə olan qaydalar istehlak kreditləri təsnifatını özünə daxil etmir. Qaydaların yeni variantına əsasən, istehlak kreditlərinə cari xərclərin qarşılanması məqsədi ilə verilmiş kreditlərI məişət kreditləri, avtomobil kreditləri; kredit kartları daxildir.
AMB-dən bildirilir ki, istehlak kreditlərinin təsnifləşdirilməsi aşağıdakı qaydada həyata
keçirilməlidir:
Əsas məbləği və ya faiz borcları kredit müqaviləsinə uyğun ödənilən
və ya 7 günədək gecikdirilmiş kreditlər - qənaətbəxş aktivlər kimi;
Əsas məbləği və ya faiz borclarının ödənilməsi kredit müqaviləsində
müəyyən olunmuş tarixdən 8 gündən 30 günədək gecikdirilmiş kreditlər - nəzarət
altında olan aktivlər kimi.
Əsas məbləği və ya faiz borclarının ödənilməsi kredit müqaviləsində
müəyyən olunmuş tarixdən 31 gündən 60 günədək gecikdirilmiş kreditlər - qeyriqənaətbəxş aktivlər kimi;
Əsas məbləği və ya faiz borclarının ödənilməsi kredit müqaviləsində
müəyyən olunmuş tarixdən 61 gündən 90 günədək gecikdirilmiş kreditlər -
təhlükəli aktivlər kimi;
Əsas məbləği və ya faiz borclarının ödənilməsi kredit müqaviləsində
müəyyən olunmuş tarixdən 90 gündən artıq gecikdirilmiş kreditlər - ümidsiz
aktivlər kimi.
