Azərbaycan, Bakı, 11 oktyabr /Trend, müxbir E.Əliyev/
2013-cü ilin yanvar-sentyabr aylarında Azərbaycanın bölgələrində sənaye və kənd təsərrüfatı, habelə ticarət və xidmət sahələrində fəaliyyət göstərən 260 müəssisə istismara verilib. Bu barədə cümə günü Trend-ə İqtisadi İnkişaf Nazirliyindən bildiriblər.
Hazırda daha 483 müəssisənin tikintisi davam etdirilir.
Nazirlikdən deyiblər ki, nəticədə ölkənin regionlarında fəaliyyət göstərən sahibkarlıq subyektlərinin sayı hesabat dövründə 14,4 faiz, vergi daxilolmaları isə 15,6 faiz artıb:
"Sahibkarlğa Kömək Milli Fondunun xətti ilə kredit şəklində sahibkarlara verilən güzəştli dövlət maliyyələşdirilməsinin 70 faizi regionların payına düşür".
Nazirlikdən qeyd ediblər ki, bu ilin 9 ayında 3527 sahibkara 245 milyon manatdan çox kredit verilib ki, bu da 10 200-dən artıq iş yeri açmağa imkan yaradıb: "Güzəştli maliyyələşdirmənin ümumi həcmindən 30 faizi Bakının payına düşür. Verilən kreditlərin ümumi sayından 67 faizi aqrar, 33 faizi isə sənaye və emal sektorlarına təqdim edilib".
Cari ilin sonuna sahibkarların güzəştli maliyyələşdirilməsinin həcmini 275 milyon manata çatdırmaq planlaşdırılır ki, bu da Fonda qaytarılan vəsaitlər hesabına 30 milyon manat həcmində əlavə kreditlərin verilməsi ilə mümkün olacaq.