Azərbaycan, Bakı, 18 noyabr /Trend, müxbir T.Cəfərov/
Azərbaycan, Türkmənistan, Əfqanıstan, Rusiya və İrandan olan nümayəndələr arasında İranın Gilan əyalətinin Məncil şəhərində keçirilən görüşdə Rəşt-Astara və Rəşt-Ənzəli dəmir yollarının tikintisi üzrə əməkdaşlığın davam etdrilməsi haqqında razılıq əldə olunub. Bunu bazar ertəsi Trend-ə Gilan əyalət başçısının tikinti işləri üzrə müavini Məhəmməd Ağacanzadə deyib.
Onun sözlərinə görə, görüşdə, həmçinin Qəzvin-Rəşt-Astara dəmir yolunun inşasının zəruriliyi, bu bölgədə tikiləcək dəmir yolunun region üçün faydası və əhəmiyyətindən danışılıb.
Noyabrın 17-də Gilan əyalətinin Məncil şəhərində Gilan əyalətinin başçısı, Yol və Şəhərsalma Nazirliyinin nümayəndələrinin, Azərbaycan, Türkmənistan və Əfqanıstan səfirlərinin, eləcə də Rusiya və Finlandiyanın baş konsullarının iştirakı ilə iclas keçirilib. İclas iştirakçıları Qəzvin-Rəşt dəmir yolunda tikinti işlərinin gedişi ilə yaxından tanış olublar.
M.Ağacanzadə bildirib ki, görüşdə Gilanın iki ən önəmli limanları olan Astara və Ənzəli limanlarına dəmir yolunun çəkilməsi məsələsi müzakirə olunub: "Rəştdən Astaraya qədər 161, Rəştdən Ənzəliyə kimi isə 41 kilometrlik dəmir yolunun inşası nəzərdə tutulur və hazırda bu dəmir yollarının tikilməsi üçün texniki layihələşdirmə işləri tamamlanıb".
Onun sözlərinə görə, görüş iştirakçıları növbəti görüşdə Rəşt-Astara və Rəşt-Ənzəli dəmir yollarının tikilməsi ilə bağlı iştirakçı ölkələr arasında əməkdaşlıq, layihələrin maliyələşdirilməsi və digər məsələlər üzrə müzakirələrin aparılacağı barədə razılığa gəliblər.
M.Ağacanzadə Qəzvin-Rəşt dəmir yolunun inşasında işlərin 80 faizdən çoxunun tamamlandığını bildirib.
Qeyd edək ki, İran rəsmiləri Qəzvin-Rəşt-Astara dəmir yolunun tikintisinin 2014-cü ilin mart ayında başa çatacağını açıqlayıblar. Dəmir yol marşrutu mürəkkəbdir və 22 tunel, 15 xüsusi körpüdən ibarətdir. 15 tunelin tikintisi üzrə işlərin 70 faizi tamamlanıb.
Xatırladaq ki, Qəzvin-Rəşt-Astara dəmir yolu Şimal-Cənub Nəqliyyat Dəhlizinin bir hissəsidir və dəmir yolun tikintisi Azərbaycan, Rusiya və İran tərəfindən həyata keçirilir. Tikinti işlərinə 400 milyon dollar məbləğində investisiya yatırılması nəzərdə tutulub. Bu dəhlizlə yükdaşıma həcminin birinci mərhələdə ildə 6 milyon ton, gələcəkdə isə ildə 15-20 milyon tona qədər olacağı proqnozlaşdırılır.