...

Bakının təkrar mənzil bazarı il ərzində 25 faizdən çox artıb

Biznes və iqtisadiyyat xəbərləri Materials 16 Dekabr 2013 20:48 (UTC +04:00)

Azərbaycan, Bakı, 16 dekabr /Trend, müxbir E.Əliyev/

2013-cü ilin noyabr ayında Bakıda təkrar mənzil bazarında qiymətlər əvvəlki ayla müqayisədə 2 faiz artaraq bir kvadratmetr üçün 1322 dollar təşkil edib. Trend-in məlumatına görə, bu barədə "Əmlak Bazarı İştirakçıları" İctimai Birliyinin yaydığı məlumatda deyilir.

2012-ci ilin müvafiq dövrü ilə müqayisədə təkrar bazarda mənzilin orta hesabla qiyməti 26,5 faiz artıb.

Monitorinqin nəticələrinə əsasən, noyabrda təkrar mənzil bazarında təklif 3 faiz azalıb. Satışa çıxarılan mənzillərin sayı 4600-ə düşüb.
Bazarda təklif portfelində Yasamal, Nəsimi, Nərimanov və Xətai rayonlarının payı 78,7 faiz təşkil edib. Portfelin uzun müddət ərzində bu dörd rayonun hesabına formalaşması həmin rayonlardakı yeni tikililərin bazara çıxarılması ilə əlaqədardır.

Araşdırmalar göstərir ki, ilkin mənzil bazarında da portfel, əsasən, bu dörd rayonun hesabına formalaşır.

Bazara orta qiymətdən aşağı təklif olunan təkrar mənzillərin payı 52,6 faiz təşkil edib. Noyabrda təkrar bazarda təklif olunan orta otaq göstəricisi 2,89, hər otağın orta qiyməti 50 114 dollar, mənzillərin qiyməti isə 118 569 dollar təşkil edib.

Təkrar mənzil bazarında alqı-satqı üzrə bağlanmış sövdələşmələrin dinamikası ay ərzində 1,7 faiz artıb.

Məqalədə:
Xəbər lenti

Xəbər lenti