Azərbaycan, Bakı, 4 mart /Trend, müxbir E.Əliyev/
Dövlət pensiyaları Azərbaycanda yoxsulluqla mübarizədə ən səmərəli mexanizmdir. Bu barədə Avropa Yenidənqurma və İnkişaf Bankının (AYİB) ölkədə fəaliyyət strategiyasının layihəsində deyilir.
Strategiya üç il müddətinə nəzərdə tutulub və 2014-cü ildən 2017-ci ilədək olan dövrü əhatə edir.
AYİB-in analitikləri hesab edirlər ki, son 10 il ərzində Azərbaycan iqtisadi inkişafın sürətlənməsi əhalinin bütün qruplarının gəlirlərinin artması və yoxsulluq həddinin 2001-ci ildəki 49,6 faizdən 2012-ci ildə altı faizədək azalması ilə səciyyələnir.
2013-cü ilin yekunlarına görə, ölkədə yoxsulluğin səviyyəsi 5,3 faiz təşkil edib.
AYİB mütəxəssisləri qeyd ediblər ki, 1999-cu ildə 12,7 faiz təşkil edən rəsmi yoxsulluq 2012-ci ilədək beş faizədək azalıb.
Strategiya layihəsində deyilir: "Azalma tendensiyası hətta böhran illərində də saxlanılıb. 2001-08-ci illərdə əməkhaqqının illik real artımı orta hesabla 13 faiz təşkil edib. Əhalinin yoxsul təbəqələrindən işçi qüvvəsinin proseslərə cəlb edilməsinin yüksək həddi Azərbaycan əhalisinin rifahına əhəmiyyətli təsir göstərib".
Azərbaycan Dövlət Statistika Komitəsinin məlumatına görə, 2014-cü il yanvarın 1-də ölkədə işsiz kimi 36,2 min nəfər qeydiyyata alınıb. Azərbaycanda işsizliyə görə müavinətin məbləği 268,5 manatdır. Ötən il ərzində müavinətin məbləği təxminən 20 faiz artıb.