Azərbaycan, Bakı, 24 aprel /Trend, müxbir E.Əliyev/
Proqnozlara görə, Bakıda mənfəətli ticarət sahələrinin ümumi həcmi 2015-ci ildə 150 min kvadratmetri ötəcək. Bu barədə Trend-ə Azərbaycan Françayzinq Assosiasiyasının sədri Rəsul Məmmədov bildirib.
O, qeyd edib ki, eyni zamanda, iri meqapolislərdə 150 min kvadratmetr təkcə bir ticarət mərkəzinin sahəsidir: "Müqayisə üçün, mənfəətli ticarət sahələrinin ümumi fondu hazırda təxminən 75 min kvadratmetrdir".
R.Məmmədov hesab edir ki, bazara azı 15 ticarət "mol"u lazımdır: "Mən indi "sağlam", yəni real fəaliyyət göstərən və inkişaf edən ticarət mərkəzlərindən danışıram. Bu gün Bakıda ən iri ticarət-əyləncə mərkəzi "28 Mall"dur, onun səmərəli sahəsi 23 min kvadratmetr təşkil edir. Bu, nisbətən kiçik sahədir. Yerli pərakəndə satış bazarı kiçikdir və nəticə olaraq, biz Azərbaycanda kifayət qədər dünya markaları, müxtəlif istiqamətlərdə məşhur franşizlər görmürük".
Onun sözlərinə görə, yerli sərmayəçilər və sahibkarlar dünya şöhrətli markaların ölkəyə gətirilməsində maraqlıdırlar: "Eyni zamanda, iri şəbəkələrin əksəriyyəti, istər fast-fud, hipermarketlər şəbəkəsi, istərsə də başqa biri olsun, yeni bazarlara özləri, vasitəçi olmadan gəlməyə üstünlük verirlər. Azərbaycan region kimi onları az maraqlandırır, çünki bazarın həcmi böyük deyil. Belə oyunçular böyük dövriyyəsi olan bazarlarla maraqlanırlar. Вu mənada iri şəbəkələrə prinsip etibarilə bütün Cənubi Qafqaz regionunun bazarlarına çıxmaq daha sərfəlidir".
