Azərbaycan, Bakı, 29 aprel /Trend/
Azərbaycanın 20-dən çox turizm şirkətinə və hotelinə Ümumdünya Turizm Təşkilatında (UNWTO) assosiativ üzvlük verilib. Trend-in məlumatına görə, bunu Azərbaycan Turizm Assosiasiyasının rəhbəri Nahid Bağırov "Rossiyskaya qazeta"ya müsahibəsində deyib.
N.Bağırov bildirib ki, yerli şirkətlərin təşkilata daxil olması ölkənin aktiv təbliğatı, həmçinin Azərbaycanın dünya turizm cəmiyyətində səs hüququna malik olması anlamına gəlir: "Biz, həmçinin 2015-ci ildə Bakıda UNWTO-ya qoşulmuş üzvlərin Baş Assambleyasının növbəti iclasını keçirməyə müvəffəq olmağa ümid edirik. Bizim assosiasiyamız Şuranın yaxın zamanlarda keçirilmiş iclasında turizm agentlərinə beynəlxalq ulduz verilməsi sisteminin tətbiq edilməsi təşəbbüsü ilə çıxış etdi və bu, UNWTO-nun rəhbərliyi tərəfindən dəstəkləndi".
Onun sözlərinə görə, postsovet məkanındakı turizm strukturları ilə əlaqələri olduqca inkişaf edir: "İlk növbədə bu, Rusiya Turizm Operatorları Assosiasiyası, Sankt-Peterburqdakı Turizm İnstitutu və "Russian Travel Guide" TV kanalına aiddir. Bu televiziya kanalı bu yaxınlarda Azərbaycanın tuirzm potensialı haqqında 7 tematik film nümayiş etdirib".
Assosiasiya rəhbəri bildirib ki, hazırda MDB-dən olan turistlərin əksəriyyəti Rusiyanın payına düşür və bu axın ildən-ilə 10-15 faiz artır.