Azərbaycan, Bakı, 22 iyul /Trend, müxbir Zülfiyyə Qurbanova/
Azərbaycanın lizinq şirkətləri bankların ardınca öz vəsaitlərinin qaytarılması üçün kollektor agentliyinin xidmətlərinə görə müraciət etməyə başlayıblar. Bu barədə çərşənbə axşamı Trend-ə Azərbaycanda yeganə "ВОА" kollektor agentliyinin direktoru Samir Mustafayev bildirib.
O qeyd edib: "Hazırda agentlik iki lizinq şirkəti ilə əməkdaşlıq edir və daha biri ilə danışıqlar aparılır".
Bundan başqa, Mustafayevin sözlərinə görə, "ВОА" dörd iri bankla əməkdaşlıq edir, bu siyahı genişlənir və hazırda daha bir bankla danışıqlar aparılır.
Agentliyin direktorunun qeyd etdiyi kimi, "ВОА"-nin cari portfeli təxminən 20-25 milyon manatdır, lakin onun ilin sonunda hansı həcmdə olacağını söyləmək mümkün deyil.
Mustafayev bildirib: "Fəaliyyət sahəmiz spesifikdir. Ona görə də biz hansısa dövrdə portfelimizin hansı həcmə çatacağını söyləyə bilmərik. Bu, bizdən yox, borc bazarının vəziyyətindən və müştərilərin müraciətlərindən asılıdır".
Onun sözlərinə görə, agentliyin müştəriləri arasında beş iri ticarət şəbəkəsi və təxminən 50 fiziki şəxs var.
O qeyd edib: "Fiziki şəxslərdən çoxlu müraciət daxil olur, biz onların əksəriyyətinə xidmət göstərməkdən imtina edirik, çünki borc sənədləşdirilməyib".
Agentliyin direktoru onu da qeyd edib ki, ümumi portfeldə fiziki şəxslərin payına təqribən 700 min manat düşür, yerdə qalan hüquqi şəxslərdir.
"BOA Kollektor Agentliyi" MMC 2011-ci il dekabrın 19-da Vergilər Nazirliyində qeydiyyatdan keçib, 2012-ci ilin sonlarında isə fəaliyyətə başlayıb.