Azərbaycan, Bakı, 15 avqust /Trend, müxbir Emil İsmayılov/
2014-cü ilin yanvar-iyun aylarında Azərbaycanda 4 535 milyon manat dəyərində tikinti işləri aparılıb. İnşaat işlərinin həcmi ötən ilin analoji dövrü ilə müqayisədə 6,9 faiz azalıb. Trend-in məlumatına görə, bu barədə Dövlət Statistika Komitəsinin hesabatında deyilir.
Görülmüş tikinti işlərinin ümumi həcmindən 64 faizi yeni tikinti, yenidənqurma və genişləndirmə, 17,5 faizi əsaslı təmir, 5,6 faizi cari təmir, 12,9 faizi isə digər inşaat işlərinin payına düşüb.
2014-cü ilin I yarısında Azərbaycanın inşaat bölməsinə 96,7 min nəfər cəlb edilib, tikinti sektorunda nominal əməkhaqqı 622,3 manat təşkil edib ki, bu da 2013-ci ilin müvafiq dövrünə nisbətən 1,5 faiz çoxdur.Belə ki, dövlət şirkətlərində orta aylıq əməkhaqqı 501,6 manat (yarım il ərzində 2,2 faiz artım), özəl şirkətlərdə isə 676,1 manat (0,7 faiz artım) təşkil edib.
Binaların tikintisi sahəsində əməkhaqqı yarım il ərzində 2,1 faiz azalaraq orta hesabla 556manat, ixtisaslaşdırılmış tikinti işlərində 19,6 faiz artaraq 894,9 manat, mülki təyinatlı tikinti işlərində isə 12,2 faiz azalaraq 498,8 manat olub.
