Azərbaycan, Bakı, 25 avqust /Trend, müxbir İlahə Məmmədli/
Azərbaycan Mərkəzi Bankı yanında Maliyyə Monitorinqi Xidməti (MMX) "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasında, terrorçuluğun maliyyələşdirilməsində, transmilli mütəşəkkil cinayətkarlığı, habelə silahlı separatizmi, ekstremizmi və muzdluluğu dəstəkləməsində, narkotik vasitələrin və ya psixotrop maddələrin qanunsuz dövriyyəsində iştirakı ehtimal olunan, maliyyə əməliyyatlarının aparılması zamanı eyniləşdirmə məlumatlarının açıqlanması tələb olunmayan dövlətlərin Siyahısı"na əlavə və dəyişikliklər edib.
Trend-in məlumatına görə, bu barədə Maliyyə Monitorinqi Xidməti rəhbərinin qurumun saytında dərc olunmuş əmrində deyilir.
Yeni siyahıya iki dövlət (Beliz və Qayana Kooperativ Respublikası) daxil edilib, üç dövlət (Nauru, Niue və Qvatemala) isə çıxarılıb.
Bu gün MMX-nin təsdiq etdiyi siyahıya 16 ölkə - İran, Ermənistan, Beliz, Əfqanıstan, İraq, Konqo Demokratik Respublikası, Koreya Xalq Demokratiyası Respublikası, Kot-d'İvuar, Qayana, Laos Xalq Demokratiyak Respublikası, Liberiya, Myanma İttifaqı Respublikası, Somali, Sudan, Tayland və Vyetnam daxildir.
Qeyd edək ki, siyahıya ən ciddi dəyişiklik 2010-cu il martın 2-də təsdiqlənmişdi. Nəticədə siyahıda ölkələrin sayı 46-dan 33-dək azaldılıb. Sonralar göstərilən kateqoriyada ölkələrin siyahısının azaldılması üzrə digər qərarlar da qəbul edilib. Daha əvvəl təsdiq edilmiş siyahıda olan ölkələr FATF-ı (Çirkli pulların yuyulmasına qarşı mübarizə üzrə maliyyə tədbirlərinin hazırlanması Qrupu) və digər beynəlxalq təşkilatlar tərəfindən qarşıya qoyulmuş öhdəliklərin icrası nəticəsində oradan çıxarılıblar.
Siyahı tərtib edilərkən BMT, Avropa Şurası, ATƏT, İƏİT, BVF, FATF, MONEYVAL və digər beynəlxalq təşkilatların bəyanat və qərarları nəzərə alınır.
