Azərbaycan, Bakı, 11 sentyabr /Trend, müxbir Zülfiyyə Qurbanova/
Azərbaycanın "ВОА" kollektor agentliyi ilk dəfə ölkədəki xarici şirkətlərin borclarına xidmət göstərməyə başlayıb. Bu barədə Trend-ə Azərbaycanda yeganə kollektor agentliyi olan ВОА-nın direktoru Samir Mustafayev bildirib.
O, qeyd edib ki, agentlik ilk dəfə üç xarici şirkətə - ABŞ, Rusiya və Ukrayna şirkətlərinə müraciət edib: "Onlar bizə Azərbaycandakı borcları barədə məlumat veriblər və biz də öz növbəmizdə, onların borclarının tam ödənilməsini təmin edirik".
S.Mustafayevin sözlərinə görə, agentliyin gələcək planlarına öz müştərilərinin siyahısını genişləndirmək daxildir: "Biz ölkənin bütün hüquqi və fiziki şəxslərinə öz xidmətlərimizi göstərməyə hazırıq. Hazırda biz 4 iri bankla, 2 lizinq şirkəti ilə işləyirik, daha bir bank və bir lizinq şirkəti ilə danışıqlar aparırıq".
Agentliyin direktoru deyib ki, yayda kollektor agentliyinin borc portfeli cüzi artıb və bu, fiziki şəxslərin hesabına baş verib: "Yay dövründə həmişə müəyyən durğunluq müşahidə olunur. Borcların ödənilməsi prosesinin aktivləşdirilməsi və yeni müştərilərlə danışıqlar payızda gözlənilir".
Yanvar-iyul aylarında agentliyin portfeli təxminən 20-25 milyon manat təşkil edib.
"ВОА kollektor agentliyi" MMC 2011-ci il dekabrın 19-da Vergilər Nazirliyində qeydiyyatdan keçib, 2012-ci ilin sonlarında isə fəaliyyətə başlayıb.