Azərbaycan, Bakı, 4 noyabr /Trend, müxbir Səba Ağayeva/
İspaniya və bu ölkənin şirkətləri Azərbaycanla uzunmüddətli əməkdaşlığın inkişafına istiqamətləniblər. Bunu Trend-ə Azərbaycanın İspaniyadakı səfiri Altay Əfəndiyev deyib.
Onun sözlərinə görə, Azərbaycan və İspaniya arasında iqtisadi əlaqələri dinamik inkişaf edən və yaxşı perspektivli kimi qiymətləndirmək olar: "Son 3-4 il ərzində iki ölkə arasında ticari-iqtisadi əlaqələr say və keyfiyyət baxımından dəyişib. Burada İspaniya şirkətlərinin, həmçinin kiçik və orta şirkətlərin müxtəlif layihələrin, o cümlədən şəhər, nəqliyyat və sosial infrastrukturun inkişafında, inzibati bina və komplekslərin tikintisi və təchizatında, ilk Avropa Oyunları üçün idman qurğularının və müvafiq infrastruktur üçün avadanlıqların yaradılması və tədarükündə, alternativ enerji, ekologiya, kənd təsərrüfatı və digər sahələrdə fəal iştirakını qeyd etmək lazımdır".
A.Əfəndiyev qeyd edib ki, eyni zamanda, İspaniya şirkətləri ikitərəfli, regional və beynəlxalq əməkdaşlıq üçün vacib strateji əhəmiyyətə malik yeni sahələrə maraq göstərirlər: "Bununla əlaqədar İspaniyanın "Tecnicas Reunidas" şirkəti başda olmaqla beynəlxalq konsorsiumu qeyd etmək lazımdır. Həmin şirkət Türkiyədə ARDNŞ-nin iri layihələrindən birini - Əliağa rayonunda neft-kimya kompleksinin tikintisini reallaşdırır. Bu şirkət əməkdaşlığın gələcəkdə möhkəmləndirilməsi və genişləndirilməsində maraqlıdır və ölkənin neft-kimya kompleksinin modernləşdirilməsi üzrə iri layihədə iştirakla bağlı ARDNŞ ilə danışıqlar aparır".
Diplomat əlavə edib ki, digər şirkət - "Gas Natural Fenosa" ARDNŞ ilə ("Şahdəniz" konsoriumu) Avropada təbii qazın alınması və paylanılması üzrə uzunmüddətli müqavilə imzalayıb.
Səfirin sözlərinə əsasən, bu yaxınlarda İspaniyanın "Enagaz" şirkəti TANAP layihəsində 16 faiz pay əldə edib: "Bütün bunlar təsdiq edir ki, İspaniya və bu ölkənin şirkətlərinin Azərbaycanla uzunmüddətli əməkdaşlığın inkişafı ilə bağlı ciddi niyyətləri var".
O vurğulayıb ki, İspaniya və Azərbaycan arasında ticari-iqtisadi əlaqələrin indiki səviyyəsi iki ölkənin potensialına uyğun gəlmir: "Hazırda münasibətlər hökumətlərarası səviyyədə yaradılmalı olan ticari-iqtisadi əlaqələrin təşviqi və inkişafı sistemindən kənar inkişaf edir. Bu istiqamətdə məqsədyönlü iş aparılır və güman edirəm ki, artıq yaxın vaxtlarda münasibətlərimizin yeni dinamikasını və genişlənməsini müşahidə edə bilərik".
A.Əfəndiyevin sözlərinə görə, sadalananlar İspaniya hökumətinin daha məqsədyönlü və ardıcıl siyasətinin formalaşdırılması üzrə niyyyətini təsdiq edir: "İspaniyanı bürümüş dərin iqtisadi böhran və ölkə hökumətinin mal və xidmətlərin beynəlxalq bazarlarda fəal irəliləməsi üzrə yeni strategiya qismində böhrana reaksiyası İspaniyanın iqtisadi diplomatiyası qarşısında yeni bazarlara çıxmaq vəzifəsini qoydu. Bu baxımdan Azərbaycan ən cəlbedici ölkələrdən biridir".
Diplomat bildirib ki, İspaniyanın Azərbaycandakı iri, kiçik və orta şirkətlərinin sayının artım dinamikası diqqəti cəlb edir: "Bu hələ informasiya çatışmazlığının hiss edilməsi, hüquq-müqavilə bazasının kifayət qədər inkişaf etməməsi, institusional dəstək və stimullaşdırıcı mexanizmlərin yoxluğu fonunda baş verir. Ölkələr arasında birbaşa aviareyslərin yoxluğu da öz sözünü deyir".
Səfir əlavə edib ki, hazırda İspaniyanın işgüzar dairələrinin maraqlarını təmsil edən dövlət və özəl strukturlar sadalanan məsələlərin tarazlaşdırılması və İspaniya şirkətlərinin Azərbaycan bazarına çıxışının təşviqi üzrə bir sıra tədbirlər görür.
A.Əfəndiyev vurğulayıb ki, İspaniya şirkətlərinin maraq dairəsi çox genişdir: "Bura tikinti, arxitektura, dizayn və interyerin dizaynı, alternativ energetika, sənaye və energetika, informatika və kommunikasiya texnologiyaları, ətraf mühitin mühafizəsi, nəqliyyat infrastrukturu, kənd təsərrüfatı və ərzaq, layihələndirmə və mühəndis xidmətləri, turizm və turizm infrastrukturu daxildir".
Diplomatın sözlərinə əsasən, İspaniya ümumilikdə xarici investisiyaların cəlb edilməsində də maraqlıdır və Azərbaycan bununla əlaqədar istisna təşkil etmir: "Məsələn, son illər Yaxın Şərqin neft hasil edən ölkələrindən investisiya artımı müşahidə olunur. Ölkədə əlverişli konyunkturadan başqa, investisiya mühiti xeyli sadələşdirilib, İspaniyanın kapital cəlb etmək niyyətində olduğu prioritet layihələrin siyahısı hazırlanıb. Bu istiqamətdə tərəflər daha məqsədyönlü iş aparmalıdırlar".