Azərbaycan, Bakı, 28 noyabr /Trend, müxbir Azad Həsənli/
Azərbaycan regionlarından (Bakı istisna olmaqla) bank sisteminə cəlb edilən əhali əmanətləri 2014-cü ilin yanvar-oktyabr aylarında 535,3 milyon manat və ya bank əmanətlərinin ümumi həcminin 8 faizini təşkil edib. Ötən ilin analoji dövrü ilə müqayisədə bu göstərici 12,55 faiz artıb. Trend-in məlumatına görə, bu barədə Azərbaycan Mərkəzi Bankının (AMB) 2014-cü ilin 10 ayının yekunu üzrə statistik hesabatında deyilir.
Bakı üzrə bu göstərici 6 470,12 milyon manat təşkil edib. Burada milli valyutada əmanətlərın payı 4 027,64 milyon manat olub. Hesabat dövründə ölkə üzrə orta faiz dərəcəsi 8, Bakı üzrə 8,1 faiz təşkil edib.
Bununla da Bakı banklar tərəfindən əhalinin əmanətlərinin cəlb edilməsi göstəricisi üzrə lider olaraq qalır.
Əhali depozitlərinin cəlb edilməsi üzrə rayonlar arasında Abşeron iqtisadi rayonu (166,03 milyon manat, orta faiz dərəcəsi illik 8,5 faiz) liderlik edir.
Hesabat dövründə əmanətlərin həcmi Aran iqtisadi rayonu üzrə 164,82 milyon manat (7,4 faiz), Dağlıq Şirvan - 15,9 milyon manat (6 faiz), Gəncə-Qazax - 61,9 milyon manat (5,9 faiz), Quba-Xaçmaz - 20,68 milyon manat (6,5 faiz), Lənkəran - 43,62 milyon manat (7,3 faiz), Şəki-Zaqatala - 23,66 milyon manat (5,4 faiz), Yuxarı Qarabağ - 12,12 milyon manat (4,3 faiz), Kəlbəcər-Laçın - 6,7 milyon manat (5,3 faiz), Naxçıvan iqtisadi rayonu üzrə isə 19,8 milyon manat (4,3 faiz) təşkil edib.