Azərbaycan, Bakı, 1 dekabr /Trend, müxbir Azad Həsənli/
Azərbaycan manatının devalvasiya təhlükəsi yoxdur. Bunu Trend-ə Milli Məclisin İqtisadi siyasət komitəsinin üzvü Vahid Əhmədov ilin əvvəlində qonşu ölkələrdə, o cümlədən Ermənistan və Qazaxıstanda baş verən milli valyutanın devalvasiyasını şərh edərkən deyib.
Onun sözlərinə görə, milli valyutanın məzənnəsini saxlamağın iki üsulu var, daha doğrusu, onu "sərbəst üzməyə" buraxmaq və ya ölkənin valyuta bazarına müdaxilə etmək.
Deputat bildirib ki, Azərbaycan ikinci yolu, yəni valyuta bazarına müdaxiləni seçib: "Azərbaycan Mərkəzi Bankı hər il milli valyutanın məzənnəsinin saxlanılmasına 1,2-1,3 milyard manat yatırır. Mərkəzi Bank sədrinin təqdim etdiyi məlumata görə, ölkəmizdə devalvasiya gözlənilmir. Çox güman ki, 2015-ci ildə manatın məzənnəsi sabit qalacaq".
V.Əhmədov vurğulayıb ki, lazım olarsa, valyuta bazarına müdaxilə olunacaq.
Onun sözlərinə görə, beynəlxalq bazarlara çıxmaq üçün milli valyutanın məzənnəsinin hansı səviyyədə olması böyük önəm kəsb edir.
Komitə üzvü əlavə edib ki, 2008-ci ildə qlobal iqtisadi böhran Azərbaycana təsir etmədi: "Çünki biz milli valyutamızın məzənnəsini saxlamağı bacardıq. Bu məqsədlə müəyyən vəsait ayrıldı, lakin bunun sayəsində əhali böhranla bağlı problem yaşamadı".