Son bir neçə ildə Avropa-Qafqaz-Asiya (TRACECA) nəqliyyat dəhlizinin Azərbaycan seqmentinin inkişafı məqsədilə Avropa Komissiyası (AK) tərəfindən maliyyələşdirilən bir sıra texniki və investisiya layihələri həyata keçirilib. Bu barədə Trend ə Azərbaycanın TRACECA Hökumətlərarası Komissiyasında milli katibi Akif Mustafayev məlumat verib.
Onun sözlərinə görə, AK-nın vəsaiti hesabına Azərbaycan Dövlət Dəmioyolu üçün 102 neft və neft məhsulları daşımaq üçün xüsusi yeni vaqon-sisternlər alıb. Bakıdan Gürcüstan sərhəddinə qədər olan 503 km məsafədə optik-lif kabelinin çəkilməsi üzrə layihə həyata keçirilib. "Bu bir neçə saniyə ərzində informasiyanı almaq və göndərmək imkanı verir", - deyə o, qeyd edib.
A. Mustafayev bildirib ki, Bakı Beynəlxalq Ticarət Dinz Limanı üçün naviqasiya avadanlıqları alınıb və quraşdırılıb. Elə burada bir neçə il əvvəl müasir konteyner terminalı istifadəyə verilmişdi.
"Hazırda onun işi səmərəli deyil. Çünki Azərbaycan ərazisində konteyner daşınmaları az həcmdə həyata keçirilir. Lakin iyulun 14-də və 15-də Bakıda keçirilən Azərbaycanın Nəqliyyat Nazirliyinin, Gürcüstanın iqtisadi inkişaf Nazirliyinin, Qazaxıstanın TRACECA dəhlizi ilə daşınmaların inkişafı üzrə Kommunikasiya və Nəqliyyat Nazirliyi üzrə nümayəndələrinin iclasında konteyner daşınmalarının artırılması və inkişafı məsələləri müzakirə olunub və Prtokol imzalanıb", - deyə A.Mustafayev bildirib.
2003-2004-cü illərdə TRACECA proqramı çərçivəsində "Nəqliyyat sektorunun rəhbər heyətinin ixtisasının artırılması" adlı çox mühüm bir layihə reallaşdırılıb. Avropa Komissiyasının maliyyələşdirdiyi bu layihəyə müvafiq olaraq, Azərbaycanın Nəqliyyat Nazirliyinin və Dövlət Gömrük Komitəsinin 30-dan artıq rəhbərlik səviyyəsində əməkdaşı MDB və Qərbi Avropanın müxtəlif ölkələrində ixtisasartırma üzrə treninq kursları keçərək mütəxəssis sertifikatları alıblar. Bundan əlavə, bir sıra texniki layihələr də həyata keçirilib.
