Xəzər dəniz gəmiçiliyi (KASPAR) idarəsinin sifarişi ilə inşası Rusiyanın "Krasnoe Sormovo" zavodunda aparılan 19619 layihəsinin üçüncü tankeri - "Şah İsmayıl Xətai" artıq Həştərxandadır.Bu barədə Trend ə KASPAR-ın mətbuat katibi Vüqar Sadıqov bildirib.
Onun sözlərinə görə, hazırda gəminin körpülərin altından keçməsi ilə bağlı olaraq təmir edilmiş dor ağacı və bacası quraşdırılır." "Şah İsmayıl Xətai" tankerinin gələn həftə Bakıda olacağı gözlənilir"-deyə o qeyd edib.
Oktyabrın 6-da Nijniy Novqorodda yeni tankerin qəbulu-verilməsi üzrə sənəd imzalanıb.Bundan sonra gəmi Bakı istiqamətində Nijniy Novqoroddan çıxıb.Gəmi iyulun 3-də suya buraxılıb.Qalan 2 gəmi oktyabrda və noyabrda Bakıda olacaq.
12 tank yüklü "Çay-dəniz" dərəcəli gəmi neft xammalı və neft məhsullarının daşınması üçün nəzərdə tutulub.Gəmi qəza zamanı neftin axmasının qarşısını alan ikili örtüyə malikdir.Bir reysdə neft məhsullarının bir neçə növünün eyni vaxtda daşınması imkanları nəzərdə tutulub.
