Qiymətli kağızlar üzrə Dövlət komitəsi korporativ normaları və sərmayəçilərin hüquqlarını pozanlara qarşı siyasəti gücləndirmək və sərt inzibati tədbirlər tətbiq etmək niyyətindədir. Trend QKDK-nin sədri Gündüz Məmmədova istinadən bildirir ki, əlavə olaraq inzibati hüquq pozuntuları haqqında Məcəlləyə dəyişiklik etməyə və sanksiyaları gücləndirməyə zərurət yoxdur.
" Mövcud cərimələri o kəslərə tətbiq etmək olar ki, onlar ilk dəfədən sonra buraxılan hüquq pozuntularını aradan qaldırmır. Belə olan təqdirdə cərimənin məbləği artırılacaq və daha optimal olacaq. Burada pozuntuya görə cəza prinsipi vacibdir ki, heç kim məsuliyyətdən kənarda qalmasın və korporativ normaların və sərmayəçilərin hüquqlarının pozulması halları baş verməsin. Düşünürəm ki, bu istiqamətdə siyasəti gücləndirəcəyik və daha sərt inzibati tədbirlər tətbiq edəcəyik" -deyə G.Məmmədov qeyd edib.
Hazırda cərimənin həcmi 220 AZN təşkil edir.
Bu gün QKDK-nin fəaliyyətinin prioritet istiqamətlərindən biri qiymətli kağızlar bazarında sərmayəçilərin hüquqlarının müdafiəsidir. 2005-ci il ərzində Dövlət komitəsinə korporativ idarəetmə normalarını pozmuş 550 səcmdar cəmiyyətin ünvanına 334 şikayət daxil olub. Araşdırmalar zamanı 132 SC-də hüquq pozuntuları aşkar edilib və onlara qarşı 30 min AZN həcmində inzibati cərimələr tətbiq olunub. 61 SC üçün qanun pozuntularının ləğvi ilə bağlı tələblər irəli sürülüb. QKDK sədrinin sözlərinə görə, 2006-cı ildə kiçik səhmdarların hüquqlarının müdafiəsi istiqamətində işi gücləndirmək lazımdır. Bir çox SC-lərin dividend verməyə başlaması müsbət amildir.