Bu ilin mayın 15-dək Xəzər dənizində ilk səyahət- sərnişin xətti açılacaq. Trend in məlumatına görə, fevralın 23-də Həştərxan vilayətinin iqtisadi inkişaf nazirinin müavini Aleksandr Nevredinov bu barədə bildirib.
Onun sözlərinə görə, Bakı regionun daha böyük meqapolislərindən biridir və buradan Avropanın bir çox şəhərlərinə təyyarə reysləri vardır. Turistlər üçün bu, çox cəlbedici olacaq. Layihənin dəyəri $15-$20 mln. təşkil edəcək.
Hollandiyanın müstəqil eksperti tərəfindən marşrutun ekspertizası aparılıb və o, marşrutun açılışı üçün müsbət qiymət verib. Qara dənizdən Xəzər dənizinə ilk teploxodun yaxın vaxtlarda gəlməsi planlaşdırılr. Bir teploxoddan istifadə nəzərdə tutulur, bu teploxod Bakı, Həştərxan, Aktau, Ənzəli marşrutu ilə həftəlik səyahət həyata keçirəcək. Türkmənbaşı limanı ilə məsələ hələlik həll edilməyib. Putyovkanın qiyməti bir gün üçün $70 təşkil edəcək. Teploxod 250 nəfərədək sərnişin daşımaq imkanına malik olacaq. Gələcəkdə bu marşrutla 5-6 gəmidən istifadə olunması planlaşdırılır və bu gəmilər gündəlik hər bir limana daxil olacaq.
A.Nevredinov qeyd edib ki, üç il ərzində bu marşrutla marketinq araşdırmaları təşkil edilib və indi bu məsələ ilə bağlı Azərbaycanla danışıqlar aparılır. Marşrutu Həştərxanın "Tintur" şirkəti vilayətin iqtisadi inkişaf nazirliyi və turizm federal agentliyinin dəstəyilə idarə edəcək.
"Biz planlaşdırırıq ki, sadələşdirilmiş, tezləşdirilmiş keçid kimi xüsusi güzəştlər olsun. Bununla bağlı olaraq bizi Rusiya iqtisadi inkişaf nazirliyinin turizm federal agentliyi dəstəkləyir" -deyə Rusiya iqtisadi inkişaf nazirliyinin nümayəndəsi bildirib.
