Azərbaycan iqtisadi inkişafına görə neftlə zəngin olan ölkələrin çoxundan irəlidədir. Trend xəbər verir ki, bu barədə Milli Məclisin iqtisadi siyasət daimi komissiyasının sədri, akademik Ziyad Səmədzadə bildirib.
Z.Səmədzadə vurğulayıb ki, neft sərvəti ilə məşhur olan Afrika ölkələrində iqtisadi inkişaf artımı 5-6 faiz təşkil edirsə, Azərbaycanda bu göstərici 25-26 faizdir: "Bu da onu göstərir ki, Azərbaycanın özünün iqtisadi inkişaf modeli mövcuddur. Çünki Azərbaycanda yaradılan Neft Fondundan istifadə iqtisadiyyatın digər sahələrinin də inkişafını sürətləndirir".
Akademik Böyük Britaniyanın bu məsələdə Azərbaycan dövlət başçısına etdiyi müraciəti yada salıb: "Müraciətdə deyilib ki, neft gəlirlərindən istifadə ilə əlaqədar olaraq Azərbaycanın seçdiyi model dünyada lider modeldir". Z.Səmədzadə qeyd edib ki, Neft Fondunda toplanan valyutanın səmərəli istifadəsi üçün imkanlar genişlənib. Akademik dövlət başçısı tərəfindən aparılan neft siyasətinin dünyada qəbul olunduğu bildirib: "Neftlə zəngin olan ölkələrin təcrübəsi göstərib ki, onlar bu məsələ haqqında 30 ildən sonra düşünüblər. Prezident isə neft gəlirləri əldə olunmamışdan öncə strateji proqramların həyata keçirilməsi, qeyri-neft sektorunun xüsusi inkişafı barədə düşündü".
