İyunun əvvəlində Kənd Təsərrüfatının inkişafı üzrə Beynəlxalq Fondla birgə (İFAD) "Azərbaycanın şimal-şərq regionlarının inkişafı" layihəsinin gerçəkləşdirilməsinə başlanacaq.
Kənd Təsərrüfatı Nazirliyi yanında kənd təsərrüfatı kreditləri üzrə dövlət agentliyindən Trend ə verilən məlumata görə, hazırda bu istiqamətdə hazırlıq işləri başa çatmaq üzrədir.
"İşçi qrupu yaradıldıqdan sonra layihənin gerçəkləşdirilməsi üzrə işlərə başlanacaq. Bu prosesi may ayı ərzində yekunlaşdırmaq planlaşdırılır" - deyə agentlikdən bildirilib.
Layihənin ümumi dəyəri $25 mln 148 min həcmində qiymətləndirilir. Bunun $12 mln-dan çoxunu İFAD ayırıb.
Bu layihədə Azərbaycanın payı əvvəlcə $2 mln. 690 min təşkil etsə də, OPEC tərəfindən illik faizin 0,75%-dən 5%-dək artması ilə əlaqədar ölkə təşkilatın kreditindən imtina edib və Fondun payının büdcə vəsaitləri hesabına maliyyələşdirilməsi qərara alınıb.
Ölkənin şimal-şərq regionlarının inkişafına yönəldilmiş layihə 15012 ailənin yaşayış şəraitinin yaxşılaşmasına imkan verəcək. Layihə çərçivəsində Abşeron, Siyəzən, Dəvəçi və Xızı regionlarında 2 və 3 dərəcəli suvarma, həmçinin, əsasən yoxsulluğun azaldılmasına yönəlmiş marketinq tədbirləri həyata keçiriləcək. Layihə çərçivəsində regionlarda təxminən $4 mln 500 min ortamüddətli kreditlərin verilməsi gözlənilir.
İFAD ilə saziş 19 iyul 2005-ci ildə Kənd Təsərrüfatı Nazirliyində strukturun rəhbəri İsmət Abbasov və Fondun ölkə üzrə meneceri Abdulla Rəhman arasında imzalanıb.
