Dövlət Əmlakının İdarə Olunması üzrə Dövlət Komitəsi "Bakı Teleqrafı"n səhmlərinin satışı haqqında elan olunmuş tenderin qalibini açıqlayıb. Bu, Böyük Britaniyanın Polton Wenyars LTD şirkətidir. Dövlət Komitəsindən Trend ə verilən məlumata əsasən, artıq alqı-satqı haqqında müqavilə də bağlanıb.
"Təqdim olunmuş investisiya proqramına əsasən, investor 4 il ərzində müəssisəyə $4 mln. vəsait yatırmağı öhdəsinə götürüb. Bu vəsait göstərilən xidmətləri müasir standartlara uyğunlaşdırmaq üçün avadanlığın alınması və quraşdırılmasına, yüksək səviyyəli infrastrukturun yaradılması, "Bakı Teleqray"da bərpa işlərin görülməsi, eləcə də sosial tədbirlərin həyata keçirilməsinə yönəldiləcək. Müəssisədə həmçinin CDMA 3-cü nəsil simsiz şəbəkənin quraşdırılması, dial-up, ADSL, triple apply və leased line internet xidmətlərinin göstərilməsi də nəzərdə tutulub. Bundan başqa, beynəlxalq peyk telefon trafikının quraşdırılması, eləcə də Azərbaycanda fəaliyyət göstərən rabitə operatorlarının məlumatlarının emalı üçün informasiya-hesablama mərkəzinin yaradılması planlaşdırılır.
Müsabiqənin şərtlərinə görə, Polton Wenyars LTD dövlət büdcəsinə 2,4 mln. manat köçürməli və Dövlət Komitəsinə 40 min özəlləşdirmə çeki və özəlləşdirmə opsionu təqdim etməlidir.
İnvestisiya qoyuluşları nəticəsində 40 yeni iş yerinin açılışı gözlənilir. Sosial tədbirlər çərçivəsində işçilərin əmək haqlarının tədricən qaldırılması, müəssisənin vəsaitləri hesabına onların könüllü sığorta edilməsi nəzərdə tutulub.
