İyulun 3-də Bakı Biznes Mərkəzində BMT-nin İnkişaf Proqramının "Qara qızılın insan qızılına çevrilməsi" layihəsi çərçivəsində dəyirmi masa keçirilib. Trend agentliyinin məlumatına əsasən, BMT-nin İnkişaf Proqramı və Azərbaycanda İxracın və İnvestisiyaların Təşviqi Fondunun (AZPROMO) təşəbbüsü ilə təşkil edilmiş tədbirdə Azərbaycanda ixtisaslaşdırılmış təhsilə dair yerli iş adamlarının ehtiyacları haqda fikir mübadiləsi aparılmışdır.
Müzakirələrdə, əsasən iş adamları, habelə bir neçə QHT-lərin nümayəndələri iştirak edib. "Araşdırmalar göstərir ki, ölkə biznes-icmasının ən böyük tələbatlarından biri yüksək bilik bazasına malik kadrlara olan tələbatıdır. Məsələnin son dərəcədə mühüm olmasını nəzərə alaraq, AZPROMO UNDP-nin bu təşəbbüsünə dəstək verməyi qərara alıb" - deyə AZPROMO-nun prezidenti Emil Məcidov bildirib.
Layihənin əsas məqsədi neft gəlirlərinin qeyri-neft sektorunun inkişafına yönəldilməsinin ən optimal yollarının araşdırılmasıdır" - deyə layihənin icraçısı, professor Maykl Hopkins qeyd edib. Onun sözlərinə görə, səslənən fikirlər Azərbaycan hökumətinə təqdim ediləcək tövsiyələrdə öz əksini tapacaq.