Avropa Komissiyası Avropa Qonşuluq Siyasəti (AQS) çərçivəsində Azərbaycan üçün 2007-ci il üzrə ilkin büdcəni müəyyən edib. Avropa Birliyinin Azərbaycana texniki yardım proqramının (Tacis) koordinasiya bürosunun icraçı direktoru Əsgər Ələkbərovun Trend ə xəbər verdiyi kimi, ölkə üçün 22-23 mln. avro nəzərdə tutulub.
Avropa komissiyası maliyyələşdirməni iki proqram - TACİS və MEDA çərçivəsində həyata keçirmək fikrindədir. 2007-2013-cü illər üçün AQS büdcəsi 15 mlrd. avro məbləğində nəzərdə tutulub, bu isə 2000-ci ildən 2006-cı illərə qədərki maliyyə həcmindən iki dəfə çoxdur. Bu vəsaitlər ölkələr arasında bölüşdürüləcək. Texniki yardımdan başqa, AB maliyyələşdirmənin yeni alətlərini, o cümlədən treninq alətlərini təklif etməyə hazırdır.
İlin sonuna qədər AQS çərçivəsində milli fəaliyyət planının təsdiqi planlaşdırılır. Bundan sonra 2-3 il üçün nəzərdə tutulmuş indikativ proqramlar işlənib hazırlanacaq və hər il üzrə 5 fəaliyyət proqramı gözdən keçiriləcək.
Azərbaycan üçün fəaliyyət planında prioritet istiqamətlər kimi ölkədə demokratiyanın gücləndirilməsi, işgüzar və sərmayə iqliminin yaxşılaşdırılması, davamlı iqtisadi inkişafın saxlanması, iqtisadiyyat sahəsində qanunvericiliyin və idarəetmə təcrübəsinin uyğunlaşdırılması, enerji və nəqliyyat sahəsində AB və AR arasındakı əməkdaşlığın, regional əməkdaşlığın gücləndirilməsi, sərhədyanı idarəetmə sahəsində əməkdaşlıq və s. müəyyən olunub. Tədbirlər üç əsas prioritet sahəyə bölünüb: idarəetmə sisteminin təkmilləşdirilməsi; iqtisadi və sosial islahatlar; energetika, nəqliyyat, ekologiya və infrastruktur.
