Azərbaycanın Rabitə və İnformasiya Texnoloigyaları Nazirliyi yeni portal üzərində işi başa çatdırır. Nazirliyin İnformasiya Cəmiyyətinin inkişafı şöbəsinin müdiri Rüfət Gülməmmədovun Trend ə verdiyi məlumata görə, portalın Azərbaycan dilli versiyası artıq hazırlanıb və hazırda ingilis və rus dilli portalların hazırlanması üzrə işlər görülür, o cümlədən bir sıra texniki məsələlər həll olunur.
"Portalın təqdimat keçirməklə sentyabradək istismara verilməsi nəzərdə tutulur", - deyə nazirliyin nümayəndəsi qeyd edib.
Yeni portalda Azərbaycanda rabitə və informasiya texnologiyaları sahəsində mövcud vəziyyət, xidmətlər, ölkədə İT sahəsinin tarixi, bu sahədə layihələr, beynəlxalq əlaqələr və əməkdaşlıq, qanunvericilik bazası və s. haqqında məlumatlar təqdim olunacaq. Portalda, həmçinin, istifadəçilərə xidmətlərin göstərilməsi üzrə xüsusi bölmə fəaliyyət göstərəcək. Burada abunəçilər onları maraqlandıran məsələlər, internet xidmətləri, şəhərlərarası və beynəlxalq rabitə, poçt və digər rabitə xidmətləri barədə məlumat ala biləcək.
Bundan başqa portala İT sahəsi üzrə yerli özəl şirkətlərin, müştərək müəssisələrin, bir sıra beynəlxalq təşkilatların, təhsil müəssisələrinin və s. istinadları daxil ediləcək.
Yeni portal istifadəçiləri çətinliyə salmamaq məqsədilə www.mincom.gov.az ünvanında yerləşdiriləcək.
