İqtisadi İnkişaf Nazirliyi və BMT İnkişaf Proqramının həyata keçirdiyi "Qara qızılın insan qızılına çevrilməsində neft gəlirlərindən potensial istifadə olunması" layihəsi üzrə Məşvərət Şurasının birinci iclası keçirilib. Trend nazirliyə istinadən xəbər verir ki, Məşvərət Şurasına İqtisadi İnkiaşf Nazirliyi və BMTİnkişaf Proqramı sədrlik edir. Şurada həmçinin DB, Maliyyə, Təhsil, Əmək və Əhalinin Sosial Müdafiəsi, Sənaye və Energetika Nazirliyi, Milli Bank, ARDNŞ və digər qurumlar təmsil olunur.
İqtisadi inkişaf naziri, şuranın həmsədri tədbir iştirakçılarını layihənin hazırlanması prosesilə tanış edib. Onun sözlərinə görə, bu layihə "2005-2025-ci illər üçün neft və qaz gəlirlərinin idarə olunması üzrə uzunmüddətli strategiya"nın həyata keçirilməsində əhəmiyyətli rol oynayacaq. İclasın əsas məqsədi yoxsulluğın azaldılması, insan kapitalının və qeyri-neft sektorunun inkişafı üzrə konkret icra mexanizmlərinin araşdırılmasıdır.
Şuranın həmsədri, BMT İnkişaf Proqramının rezident əlaqələndiricisi Marko Barsotti Azərbaycan prezidenti tərəfindən uğurla həyata keçirilən neft strategiyasına uyğun olaraq, "Qara qızılın insan qızılına çevrilməsi" konsepisyanın artıq reallığa çevrilməkdə olduğunu diqqətə çatdırıb.
O hesab edir ki, layihə çərçivəsində Milli Təhsil-Təqaüd Fondunun yaradılması, İnsan Resurslarının İnkişafı üzrə Strategiyanın hazırlanması haqqında təklifləri bu istiqamətdə atılan konkret addımlar kimi qiymətləndirilə bilər.
İclas zamanı layihə çərçivəsində fəaliyyət göstərən beynəlxalq ekspertlər qrupunun rəhbəri Maykl Hopkins və BMT İnkişaf Proqramının nümayəndəsi Deyvid Eyzenberq Təhsil-Təqaüd Fondunun təqdimat mərasimini keçirib. Fondun yaradılması haqqında təkliflər 2006-cı ilin noyabrına qədər ümumiləşdirilərək hökumətə təqdim olunacaq.
