Beynəlxalq İnkişaf Assosiasiyasının "Azərbaycanın kənd sərmayələri" layihəsi (AzRİP) çərçivəsində mumi məbləği 540 min ABŞ dolları olan 12 layihə həyata keçirilib. Trend layihə qrupunun məlumatına istinadən xəbər verir ki, 900 min ABŞ dolları dəyərində 21 layihənin gerçəkləşdirilməsi hələ davam edir.
Həyata keçirilmiş layihələr arasında içməli su ilə təchizat, kənd yollarının bərpası, məktəblərin təmiri və tikintisi və s. layihələr var. Layihə çərçivəsində Azərbaycanın 21 rayonunda 400-500 icma layihəsinin gerçəkləşdirilməsi nəzərdə tutulub. AzRİP-in idarə qrupunun təşəbbüsü ilə hazırda icmaların fəaliyyət şəbəkəsi yaradılır. Şəbəkə icmaların inteqrasiyasına, işgüzar əlaqələrin qurulmasına, layihələrin həyata keçirilməsi zamanı təcrübə mübadiləsinə xidmət edəcək. Bu məqsədlə müxtəlif inkişaf mərhələlərində olan icmalarla zona görüşlərinin keçirilməsi planlaşdırılır.
Növbəti görüş sentyabrın 4-9-na nəzərdə tutulub. Görüşdə Naxçıvan, Şirvan və Muğan-Salyan bölgələrindəki 45 icmadan təxminən 100 nümayəndə iştirak edəcək. Tədbir iştirakçıları Saatlı, Sabirabad, Yevlax, Göyçay və Culfada olacaq, təcrübə mübadiləsi aparacaqlar.
AzRİP layihəsi üzrə kredit sazişi 23 sentyabr 2004-cü ildə imzalanıb, 29 dekabr 2004-cü ildə isə qüvvəyə minib. Layihənin ümumi dəyəri 21 mln. ABŞ dolları həcmində qiymətləndirilir, bu məbləğdən 15 mln. ABŞ dolları BİA-nın krediti, 3,3 mln. ABŞ dolları - Yaponiya hökümətinin qrantıdır, qalan hissə isə hökümətin layihədəki payı hesabına ödənilib. AzRİP layihəsi üç bölgəni əhatə edir: Şirvan, Muğan-Salyan zonası və Naxçıvan MR.