Azərsu ASC Oğuz-Qəbələ-Bakı su kəmərinin çəkiliş layihəsi çərçivəsində Oğuz-Qəbələ zonasında suburaxıcı qurğunun layihələndirilməsi, alınması və qurulması üçün tender elan edib. Trend xəbər verir ki, tenderdə 35 km suburaxıcı xəttdə 100 artezian quyusunun qazılması və avadanlıqla təchizi, suburaxıcı zonanın şərq qurtaracağının yaxınlığındakı su anbarına su nəqli üçün nasos, su kəmərləri və materiallarla təchizat nəzərdə tutulub.
Tenderdə maraqlı olanlan 3 min AZN və ya 3,5 min ABŞ dolları ödəməlidirlər. Tender təklifləri oktyabrın 17-nə qədər qəbul olunacaq. Prosedurun özü oktyabrın 17-də saat 17.00-da olacaq.
Uzunluğu 264 km və diametri 2 m olan Oğuz-Qəbələ-Bakı su kəməri ilə saniyədə 3 kubmetr su Bakıya çatdırılacaq.
Bu zonanın yeraltı sularının istismar ehtiyatı 15 m3/saniyədən çoxdur.
Su kəməri marşrutu Oğuz-Qəbələ ərazisində su anbarından və Çarxana-Göyçay-Ağsu-Udullu ərazisindən keçəcək. Onun ümumi uzunluğu 280 km təşkil edəcək. Su kəməri üzrə tikinti işlərinin ilin sonunadək başlanması və 2008-ci ildə istismara verilməsi planlaşdırılır.
Bakı şəhərində su təchizatının yaxşılaşdırılması üçün Oğuz-Qəbələ zonasında su kəmərinin çəkilişi haqqında sərəncam 2002-ci ilin dekabr ayında prezident Heydər Əliyev tərəfindən qəbul olunub. Bu sərəncamla əlaqədar Azərsu SC işlər görüb və mənbədə su ehtiyatlarının dəqiqləşdirilməsi üçün Ekologiya və Təbii Sərvətlər Nazirliyi hidrogeoloji tədqiqatlar həyata keçirib.
1 sentyabr 2005-ci ildə ölkə prezidenti İlham Əliyevin yanında keçirilmiş toplantıda Oğuz-Qəbələ- Bakı su kəmərinin çəkilişi məqsədəuyğun hesab olunub və TİƏ-nin hazırlanması üzrə müvafiq sərəncam verilib. Bu işlə Almaniyanın CES Consulting Engineers şirkəti məşğul olur.
