Qars-Axalkalaki-Tbilisi-Bakı marşrutu üzrə dəmir yolu xəttinin açılması layihəsinə dair görüş oktyabrda baş tutacaq. Azərbaycan Nəqliyyat Nazirliyindən Trend ə verilən məlumata görə, görüşdə layihənin maliyyələşdirilməsi məsələsi müzakirə olunacaq. Marşrutun layihələndirilməsi onun maliyyəsi ilə bağlı bütün məsələlər müəyyən edildikdən sonra başlanacaq.
Layihə üzrə tikinti işləri üçün cəlb olunacaq kredit vəsaitlərinin qaytarılması sxem üzrə, hər bir hissə öz xərcini ödədikdə həyata keçiriləcək. Hər hissə üçün tarif spesifik olacaq və bu məsələlər işçi qrupları tərəfindən müəyyən olunacaq.
Qars-Axalkalaki-Tbilisi-Bakı dəmir yolu nəqliyyat dəhlizinin yaradılması layihəsi 98 km uzunluğunda olan Qars-Axalkalaki dəmir yolu qolunun tikintisini nəzərdə tutur. Yolun 68 km-i Türkiyə, 30 km-i isə Gürcüstan ərazisinin payına düşür. Həmçinin, Axalkalaki-Tbilisi hissəsində müəyyən rekonstruksiyaya ehtiyac var. Layihənin orta dəyəri $400 mln. məbləğində qiymətləndirilir.
