Azərbaycanın Kənd Təsərrüfatı Nazirliyinin Bakıda təşkil etdiyi yarmarkalarda təxminən 8400 ton kənd təsərrüfatı məhsulu satılıb. Bu barədə Trend ə nazirlikdən məlumat verilib.
Nazirlik nümayəndəsinin sözlərinə görə, satılmış ət məhsullarının həcmi 150 ton, süd məhsullarının - 170 ton, konserv məhsullarının - 260 ton, taxıl məhsullarının - 200 ton, meyvələrin - 1300 ton, tərəvəz məhsullarının - 3700 ton, kartofun - 740 ton, bostan məhsullarının həcmi 1200 tondan çox olub.
Kənd təsərrüfatı məhsullarının satış yarmarkaları iyulun sonundan şəhər əhalisinin kənd təsərrüfatı məhsulları ilə təminatının yaxşılaşdırılması və qiymət artımının qarşısının alınması məqsədilə keçirilir.
Kənd təsərrüfatı yarmarkaları hər şənbə və bazar günləri Bakı şəhərinin Suraxanı, Nərimanov, Yasamal, Xətai, Nizami, Binəqədi və Nəsimi rayonları ərazisində təşkil olunur.
