Azərbaycana 2006-cı il üçün suveren reytinqin təltif edilməsi məqsədilə ölkənin iqtisadi vəziyyətinin icmalının aparılması üçün noyabrın 21-də Fitch Ratings beynəlxalq reytinq agentliyinin nümayəndə heyətinin Bakıya səfəri başlayır. Maliyyə Nazirliyindən Trend ə verilən xəbərə görə, Azərbaycana yenilənmiş reytinqin 2006-cı ilin sonunadək veriləcəyi ehtimal olunur. Bunun üçün agentliyin Moskva ofisi artıq reytinqin sonrakı təltif olunması üçün Fitch agentliyini maraqlandıran sualları göndərib. Suallar məlumatların yığılması üçün müvafiq nazirlik və idarələrə göndərilib. Həmin məlumatlar Fitch-in nümayəndə heyətinə təqdim olunacaq və daha çox maraq doğuran suallar müzakirə ediləcək.
İlin əvvəlində Fitch Ratings təsdiq edib ki, Azərbaycanın xarici və milli valyutadakı suveren reytinqləri əvvəlki (2004-cü ildə olduğu kimi) - BB səviyyədə saxlansa, proqnoz "stabildir". Eyni zamanda agentlik B səviyyəsində qısamüddətli reytinq və BB səviyyəsində "ölkə tavanı" reytinqini təsdiq edib.
Ölkənin qiymətləndirilməsi 2005-ci ilin iyul ayında Maliyyə Nazirliyi və Fitch Ratings arasında bağlanmış üçillik müqavilə əsasında həyata keçiriləcək. Əldə olunmuş razılığa əsasən reytinq agentliyi 2005-07-ci illər ərzində suveren reytinqinin verilməsi məqsədilə ölkədə icmal keçirəcək. Fitch agentliyinin xidmətlərinin ödənilməsi üçün Maliyyə Nazirliyi hər il dövlət büdcəsindən təxminən 40 min funt sterlinq ayıracaq.
Azərbaycan 14 sentyabr 2006-cı il tarixində ilk dəfə Moody's Investor Services ikinci beynəlxalq agentlikdən reytinq alıb. Agentlik ölkəyə Fitch Ratings versiyası üzrə reytinqdən bir pillə yüksək və investisiya səviyyəsindən bir pillə aşağı reytinq verib. Moody's agentliyinin qiymətləndirmələrinə görə, ölkəyə Ba1 səviyyəsində reytinq təltif olunub. Hökümət 2007-ci ildə hər iki agentlikdən investisiya reytinqi alacağına ümid edir.