Azərbaycan, Bakı/ Trend müxbir İ.Xəlilova / Azərbaycan Türkiyə İş Adamları Birliyi (ATİB) 2007-ci ildə üç ölkəyə - Rusiya, ABŞ və Avropa Birliyinin əsas strukturlarının yerləşdiyi Belçikaya işgüzar səfərlər təşkil etmək niyyətindədir. Bu barədə ATİB-in məlumatında göstərilib. Səfərlər zamanı bu ölkənin iş adamlarının, həmçinin Azərbaycan və Türkiyə iş adamlarının iştirak etdiyi biznes forumun, həmin ölkələrin aparıcı universitetlərindən birində elmi-praktiki konfransın, Türkiyə və Azərbaycan həmin ölkələrdəki diasporlarının birgə iclasının təşkil edilməsi planlaşdırılır. Həmçinin, yüksək vəzifəli rəsmi şəxslər, qeyri-hökumət təşkilatları və lobbi şirkətlərinin nümayəndələri ilə görüşlər keçirilməsi nəzərdə tutulur. İlk olaraq 22-25 mart tarixlərində Rusiyanın paytaxtı Moskva şəhərinə bu cür səfər təşkil olunub. Nümayəndə heyətinin tərkibinə ATİB İdarə Heyətinin sədri Ahmet Erentok, ARİƏP İdarə Heyətinin sədri İntiqam Hüseynov, ARİƏP İdarə Heyətinin üzvü Fərhad Mehdiyev, ATİB baş katibi Nurdan Kanber və ATİB baş katibinin müavini Rəşad Rəsullu daxil idilər. Rusiyanın Müasir Humanitar Akademiyasının rektoru, professor Mixail Karpenko ilə keçirilən görüşdə 7 iyun 2007-ci ildə onun başçılıq etdiyi qurumda "Avrasiya geosiyasətində Türkiyə, Rusiya və Azərbaycanın yeri" mövzusunda elmi-praktiki konfransın keçirilməsi qərara alınıb. Akademiya ilə əməkdaşlıq çərçivəsində Azərbaycanda Türkiyə -Azərbaycan - Rusiya innovasiya mərkəzinin yaradılması istiqamətində işlərə başlanması da qərara alınıb.
Ümumrusiya Azərbaycan Konqresinin icraçı direktoru Eldar Quliyev ilə keçirilən görüş nəticəsində 6 iyun 2007-ci ildə Moskvada Azərbaycan və Türkiyə diasporlarının birgə iclasının keçirilməsi qərara alınıb. İclas zamanı Bakıda keçirilmiş Dünya Azərbaycan və türk diaspor təşkilatları rəhbərlərinin I forumunun nəticələrinin, bu nəticələrdən irəli gələn vəzifələrin müzakirə edilməsi planlaşdırılır. . Digər müzakirə mövzusu isə Azərbaycanın qeyri-neft sektoruna investisiyaların cəlb edilməsi olacaq. Azərbaycanın və Türkiyənin Rusiyadakı səfirlikləri ATİB-in təşəbbüsü üçün müvafiq kömək göstərməyə hazır olduqlarını bildiriblər.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
.jpg)
.jpg)
