Azərbaycan, Bakı / Trend / "Azərbaycan meliorasiya və su təsərrüfatı" Açıq Səhmdar Cəmiyyəti Şəmkirçay üzərində tikinti işlərinin aparılması ilə bağlı tender elan edib.
Qurumun yaydığı xəbərdə bildirilir ki, tender Kürün Şəmkirçay qolunda eni 150 metr, uzunluğu 692,2 metr və su tutumu 160 mln. kubmetr təşkil edən gil və qum-çınqıldan ibarət bəndin, habelə gücü 24438 kVT olan su elektrik stansiyasının inşasını nəzərdə tutur. Tikinti işləri üçün vəsaitlər Nazirlər Kabinetinin 19 fevral 2007-ci il tarixli qərarına əsasən, dövlət büdcəsindən ayrılacaq.
Tenderə maraq göstərən şirkətlər müvafiq sənədləri iyunun 20-dək, tender təkliflərini isə iyulun 3-dək (saat 12.00-dək) təqdim etməlidir. Paketlərin açılışı iyulun 3-də saat 15.00-da olacaq. Tenderdə iştirakın qiyməti 5 min manatdır.
