Azərbaycan,Bakı/müxbir Trend İ.Xəlilova/ Azərbaycanda dövlət borcunun idarə olunmasının funksional təcrübəsinin aparılması üçün mayın 17-dən 18-nə qədər Beynəlxalq Valyuta Fondunun (BVF) missiyası Bakıda olacaq. Bu barədə çərşənbə axşamı BVF-nin Bakıdakı nümayəndəliyindən məlumat verilib.
Missiyanın tərkibində layihənin regional korrdinatoru Verner Riki və Mərkəzi Asiya və Azərbaycanda dövlət borcunun idarə olunması üzrə texniki yardım üzrə regional layihənin direktoru Qulam Azərbaycani təmsil olunacaq.
Səfər çərçivəsində Azərbaycanın Maliyyə Nazirliyi və Milli Bankının əməkdaşları üçün seminarın keçirilməsi planlaşdırılır. Daha sonra Maliyyə Nazirliyi əməkdaşları üçün təqdimat keçiriləcək. Məsləhətləşmələr həmçinin Bakı Fond Birjasında da gözlənilir.
BVF-in regional layihəsi keçən il dövlət borcunun idarə olunmasının təkmilləşdirilməsi və dövlət qiymətli kağızlar bazarının inkişafı çərçivəsində imkanların genişlərdirilməsi barədə qərar qəbul etmiş İsveçrənin İqtisadi Məsələlər üzrə Dövlət Katibliyinin (Seco) texniki yardımı ilə həyata keçirilir. Texniki yardımın həcmi 2 mln. dollar, layihənin reallaşma müddəti isə üç il təşkil edir. Layihə BVF-nin Texniki İdarəetmə Ofisi tərəfindən həyata keçiriləcək və Azərbaycan, Qırğızıstan və Tacikistan üçün hesablanıb. Ümumi texniki yardımdan Azərbaycana 30 faiz ayrılacaq.