Azərbaycan, Bakı /müxbir Trend İ.Xəlilova / Azərbaycan Dövlət Gömrük Komitəsi dörd pilləli differensasiya tarif sisteminə keçid üzrə təklifləri Nazirlər Kabinetinə təqdim edib. Bu barədə bu gün Xəzər İşgüzar və İnteqrasiya Klubunun üzvləri ilə görüşdə DGK-nin rəhbəri Aydın Əliyev məlumat verib.
2001-ci ildən bu günə qədər respublikada 0%, 0,5%, 1%, 3%, 5%, 10% və 15% fəaliyyət göstərir. Klassifikasiyanın dəyişdirilməsi nəticəsində yalnız 0%, 5%, 10% və 15%-lər qalacaq. İstehsal təyinatlı (xammal və avadanlıq) məhsullarının böyük hissəsinə və həmçinin bu gün 0,5 faiz üzrə gömrük rüsumu qoyulan məhsullara sıfır faizi üzrə vergi qoyulacaq. Bu, Nazirlər Kabinetinin sərəncamına əsasən idxal zamanı sıfır faizi üzrə ƏDV qoyulan məhsullar qrupunun (əsasən, 84 və 85 qrup) növlərinə aiddir. Onların payına idxalın təqribən 10-15 faizi düşür.
Əliyevin sözlərinə görə, Azərbaycanın Ümumdünya Ticarət Təşkilatına (ÜTT) daxil olması çərçivəsində gömrük orqanlarının üzərinə iki vəzifə qoyulub - gömrük vergi və rüsumlarının nəzərdən keçirilməsi və yeni modelin tətbiqi, həmçinin əqli mülkiyyətə olan hüququn təminatı. Bu gün bütün dünyada əsas problemlərdən biri saxta məhsulların dövriyyəsidir.
Fevralda Bakıda beynəlxalq konfransda bu problemin bütün ölkələrdə mövcudluğu qeyd olunub. DGK-nin rəhbəri hesab edir ki, Azərbaycanın da bu məsələ ilə bağlı müəyyən öhdəlikləri var. "2-3 il bundan əvvəl intellektual mülkiyyət hüququnun müdafiəsi üzrə tədbirlər çərçivəsində Gömrük Məcəlləsinə dünyanın məşhur istehsalçılarının hüquqlarının müdafiəsi üzrə dəyişikliklər edilib", - deyə Əliyev bildirib.