Azərbaycan, Bakı/ Trend /Yanvar-may ərzində Azərbaycanın ticarət şəbəkələri tərəfindən əhaliyə 2,9 mlrd. manat məbləğində istehlak malları satılıb, bu da keçən ilin analoji dövründən 14,3 faiz çoxdur. Bu barədə Dövlət Statistika Komitəsi məlumat verib.
Ümumi məbləğin 1,9 mlrd. manatı ərzaq malları, 1 mlrd. manatı isə qeyri-ərzaq malları təşkil edib. Hər iki mal növü üzrə satış artımı 2006-cı ilin eyni dövrü ilə müqayisədə müvafiq olaraq 11,7 və 20,2 faiz təşkil edib.
Əhaliyə 797,9 mln. manat və ya 32,8 faiz çox ödənişli xidmətlər göstərilib. Göstərilmiş xidmətlərin 75,2 faizi hüquqi şəxslər, 24,8 faizi fiziki şəxslərin payına düşüb. Artım müvafiq olaraq 34,1 və 29,2 faiz təşkil edib.
Ümumi satış dövriyyəsinin 16,2 faizi hüquqi şəxslərin, 48,5 faizi təşkil olunmuş yarmarka və bazarlarda fiziki şəxslərin, yalnız 35,3 faizi sahibkarların payına düşüb.
