Azərbaycan, Bakı/ Trend müxbir İ.Xəlilova/ Azərbaycanın qiymətli kağızlar və daşınmaz əmlak bazarının perspektiv əməkdaşlıq üçün öyrənilməsi niyyəti ilə iyulun 9-16-da "Ansher Group" tərkibinə daxil olan Özbəkistanın "Ansher Capital" şirkətinin baş direktoru Ranşar Yunusov Azərbaycana səfər edəcək. Bu barədə şirkətdən məlumat verilib.
MDB bazarında şirkətin əməliyyatlarının genişləndirilməsi planı ilə əlaqədar "Ansher Capital" Azərbaycan bazarını da perspektivli hesab edir.
"Biz öz vəsaitlərimiz hesabına fond bazarında, xüsusilə bankların və şirkətlərin səhmlərinin investisiyalaşdırılması, həmçinin daşınmaz əmlak bazarında iştirak etməyə hazırıq" - deyə şirkətdən bildirilib.
İlkin mərhələdə investisiyaların həcmi 1-5 mln. dollar ola bilər.
Hazırda "Ansher Capital" Özbəkistan, Qazaxıstan və Gürcüstan bazarlarında iştirak edir. Şirkət "Bank of Georgia"nın səhmdarlarından biridir.
Gürcüstanda da şirkətin qoyduğu vəsaitlər elə Azərbaycana təklif olunan həcmdədir. Qazaxıstanda bu vəsaitlər daha yüksək, Özbəkistanda isə 10 dəfədən çoxdur.
