Azərbaycan, Bakı/ Trend müxbir S.Babayeva/ Təqribən 10 Bank Azərbaycan Respublikası Kənd Təsərrüfatı Nazirliyi yanında fəaliyyət göstərən Kənd Təsərrüfatı kreditləri üzrə Dövlət Agetliyinin xətti üzrə kreditləşmədə iştirak etmək üçün müraciət edib.
Çərşənbə axşamı agentlik rəhbərinin müavini Famil Rüstəmov bildirib ki, bank və qeyri-bank təşkilatlarının təkliflərini bir sıra nazirliklərin nümayəndələrindən ibarət xüsusi komissiya qiymətləndirməlidir.
Rüstəmov kreditləşmə prosesində iştirak etmək üçn müraciət etmiş bütün maliyyə qurumlarının seçilməsini də istisna etməyib. Bununla belə fermerlərin agentliyin xətti ilə kredit alınmasına marağı böyükdür.
"Banklar seçilən kimi kreditlərin verilməsinə başlanacaq",-deyə Rüstəmov bildirib.
Agentlik müvəkkil təşkilatlar vasitəsilə aqrar sahibkarlıq sahəsində fəaliyyət gsöstərən fiziki və hüquqi şəxslərə güzəştli kreditlər verəcək.
Daha öncə kənd təsərrüfatı naziri İsmət Abbasovun bildirdiyinə görə, Agentlik iyul ayından etibarən kreditlərin verilməsinə başlaya bilər. İlkin mərhələdə bu məqsədlə 5 mln. manat sərf olunması planlaşdırılır.
Nazir hesab edir ki, ilk növbədə istehsalın artırılması üçün kreditlər kənd təsərrüfatı məhsulu istehsalçılarına verilməlidir.
Azərbaycan Nazirlər Kabinetinin sərəncamına əsasən, kreditlər aşağıdakı istiqamətlərdə sərf oluna bilər:
- Kənd təsərrüfatı məhsullarının istehsalı və emalı,
- torpaqların suvarılması üçün meliorasiyanın yaxşılaşdırılması,
- irriqasiya avadanlığı ilə təmin olunmaq üçün,
- qida məhsulları sektorunun inkişafı və müasirləşdirilməsi,
- kənd təsərrüfatı texnikası və kiimyəvi maddələrin alınması,
- Kənd Təsərrüfatı Nazirliyinin pilot layihələrinə,
- heyvandarlıqda süni mayalandırma,
Agentliyin xətti ilə 2 il müddətinə mikrokreditlər, 1-20 min manat məbləğində kiçik kreditlər, 3 il müddətinə 20-50 min manat dəyərində orta kreditlər, 50-200 min manat dəyərində 5 il müddətinə iri kreditlər veriləcək.
