Azərbaycan, Bakı / Trend , müxbir İ.Xəlilova / Cənubi Koreya Azərbaycanda suvarma texnikasının istehsalı məqsədilə minizavodların tikintisini nəzərdə tutur. Bu haqda məlumatı kənd təsərrüfatı nazirinin müavini Bəhram Əliyev verib.
Onun fikrincə, hazırda Azərbaycanda suyun çatışmazlığı üzündən bu texnikaya böyük ehtiyac duyulur. Azərbaycanın suya olan tələbatı 30,3 mlrd. kubmetr təşkil edir ki, bu tələbatın da 20 mlrd. kubmetri çaylardan gələn su vasitəsilə təmin olunur.
Qlobal istiləşmə ilə əlaqədar olaraq, Azərbaycan çaylarının debiti 23 mlrd. kubmetrə qədər azalıb ki, bu da suyun çatışmazlığına gətirib çıxarır. "Bu vəziyyətdə suvarma texnikasının istifadəsinə ehtiyac yaranır. Koreya şirkətləri bu sahədə yüksək texnologiyalara malik olduqlarından onların Azərbaycanda da tətbiq olunması təklif olunur" - deyə Əliyev bildirib.
Bu tədbirlər öz əksini hələ ki, protokollar səviyyəsində tapıb, lakin gələcəkdə bu sahədə əməkdaşlığı genişləndirmək planlaşdırılır. Nazirin müavininin sözlərinə görə, iki variant nəzərdən keçirilir, Azərbaycanda suvarma texnikasının istehsalının təşkili və ya Koreya qurğularının Azərbaycana idxalı.
Dövlətin dəstəyi ilə bu tədbirlər ilkin mərhələdə öz suvarma texnikasını təqdim etməyə hazır olacaq özəl şirkətlər tərəfindən həyata keçiriləcək və onların yerli şəraitə cavab verdiyi tədqirdə bu qurğuların Azərbaycanda istehsalına başlanacaq.
