Azərbaycan, Bakı/ Trend / Anshad Petrol birgə müəssisəsi (BM) və "Gobustan Operating Company" əməliyyat şirkəti 2007-ci ilin yanvar-sentyabr aylarında Azərbaycan Dövlət Neft Şirkətinə (ARDNŞ) 18,35 mln. kubmetr sərbəst qaz satıblar ki, bu da 2006-cı ilin müvafiq dövrü ilə müqayisədə 0,13 mln. kubmetr çoxdur. Bu barədə ARDNŞ-dən məlumat verilib.
ARDNŞ-nin məlumatlarına əsasən, 2007-ci ilin sentyabr ayında şirkətlər tərəfindən 1,12 mln. kubmetr qaz satılıb.
Sərbəst qazın ilkin satışına şirkət 2004-cü ildən 2 mln kubmetr həcmlə başlayıb. ARDNŞ qazı Anshad Petrol-dan 65 min AZM-lə ($13/1 min m3) alaraq, "Azəriqaz" QSC-yə satır. "Azəriqaz" QSC də, öz növbəsində, tərkibinə daxil olan "Aztransqaz" vasitəsilə qazın bölgüsünü həyata keçirir. GOC AZRDNŞ-ə qazı $1.33/1 mln. BTU ($1.33/1 mln. BTU - $47,4/1 min m3) ilə satır.
Gobustan Operating Company (GOC) ARDNŞ-lə bağlanılmış PSA üzrə "Cənub-qərbi Qobustan" blokunun işlənilməsi ilə məşğuldur. Sərbəst qazın satışına bu şirkət bu ilin fevralından başlanıb. GOC-da 80 faiz iştirak payı Commonwealth Gobustan Limited-ə, 20 faiz isə ARDNŞ-ə məxsusdur. Commonwealth Gobustan Limited-in səhmlərinin 37,17 faizi Arawak Energy və 62,83 faizi China National Petroleum Company şirkətlər qrupuna məxsusdur.
Anshad Petrol müqavilə əsasında, "Neftçala", "Xillı" və "Babazənən" quyularından qaz hasil edir. Anshad Petrol BM 1993-cü ildə ARDNŞ və Atilla Dogan Petrol tərəfindən yaradılıb. 1994-1996-cı illərdə Anshad Petrol BM-in operatoru Atilla Dogan Petrol idi. 1997-ci ildə bu vəzifəni ARDNŞ öz üzərinə götürürb.
1995-ci ildə isə, Malayziyanın Land and General Berhad şirkəti Atilla Dogan Petrol-dan 17,15 faiz pay alaraq, iştirakçıya çevrilib.