Azərbaycan, Bakı, 04 aprel/ Trend , müxbir E.İsmayılov/ Yanvar-martda Azərbaycan 2,65 mlrd. kubmetr qaz təhvil verib. Bunun 1,65 mlrd. kubmetri Azərbaycan Dövlət Neft Şirkətinin (ARDNŞ) payına düşüb. Şirkət, qazı öz vəsaitləri hesabına işlənən yataqlardan hasil edib. Bu barədə ARDNŞ-nin cümə günü yayılan məlumatında deyilir.
Şirkətin press-relizində qeyd olunur ki, birinci rübdə qalan 980,9 mln. kubmetr qaz Azərbaycan Beynəlxalq Əməliyyat Şirkəti (ABƏŞ) tərəfindən "Azəri-Çıraq-Günəşli" yatağından neftlə birlikdə hasil edilən səmt qazının və "Şahdəniz" müqavilə sahəsinin payına düşüb.
Martda dövlətə 898,7 mln. kubmetr qaz təhvil verilib. Bunun 578,35 mln. kubmetri ARDNŞ-nin, 320,33 mln. kubmetri ABƏŞ-in və "Şahdəniz" layihəsinin payına düşüb.
1994-cü ildə imzalanmış PSA tipli müqaviləyə əsasən, ABƏŞ, müqavilə üzrə neft-qaz əməliyyatlarının aparılması üçün konsorsiuma lazım olan həcmlər istisna olmaqla, "Azəri-Çıraq-Günəşli" yatağından neftlə birlikdə hasil edilən səmt qazını əvəzsiz olaraq Azərbaycana verir.
Müəlliflə əlaqə saxlamaq üçün elektron ünvan: [email protected]
