Azərbaycan, Bakı, 22 oktyabr/ Trend / SOCAR-ın (Azərbaycan Dövlət Neft Şirkəti) "Bayıl limanı" Dəniz Qazma İşləri İdarəsi "Günəşli-15" platformasında yeni neft-qaz quyusunun qazma işlərini başa çatdırıb. Bu barədə SOCAR-ın məlumatında bildirilir.
Quyunun dərinliyi 4195 metrdir. Yaxın günlərdə quyu sınaqdan keçiriləcək. O, "28 may" Neft-Qaz Çixarma İdarəsi (NQÇİ) tərəfindən istismar olunacaq.
"Günəşli" ARDNŞ-ın müstəqil istismar etdiyi ən iri neft-qaz yatağıdır. ARDNŞ-ın hasil etdiyi neftin 60 faizi, qaz həcminin isə 70 faizi bu yatağın payına düşür.
Yeni quyunların qazılması SOCAR-ın təsdiq etdiyi "28 may" NQÇİ-nin 2008-2010-cu illərdə yeni inkişaf proqramı çərçivəsində həyata keçirilir. NQÇİ "Günəşli" neft-qaz yatağının az sulu hissəsini istismar edir. Proqram çərçivəsində neft hasilatının stabilləşdirilməsi və təbii qaz hasilatı həcminin artırılması planlaşdırılır.
