Azərbaycan, Bakı, 10 noyabr/ Trend , müxbir N.Abdullayeva/ Yunanıstanın inkişaf naziri Xristos Foliasın bu həftə Bakıya səfəri zamanı Azərbaycan və Yunanıstan arasında enerji əməkdaşlığı müzakirə olunub.
"Yunanıstan Azərbaycandan təxminən 1 mlrd. kubmetr qaz almaq niyyətindədir", - Folias əvvəllər Bakıda jurnalistlərə bildirmişdi. Yunanıstan həmçinin Azərbaycan qazının Avropaya nəqli üçün tranzit ölkə qismində çıxış etmək niyyətindədir.
Yunanıstanın DEPA neft-qaz şirkəti "Şahdəniz" qaz-kondensat yatağından hasil edilən Azərbaycan qazının Yunanıstana nəqli üzrə danışıqlara başlamağa hazırdır. Yunanıstanın inkişaf naziri SOCAR-da və Azərbaycanın Yanacaq və Energetika Nazirliyində görüş keçirmək niyyətindədir.
Danışıqlar Foliasın IV Enerji Sammitində iştirakı çərçivəsində baş tutacaq. Yunanıstanın Azərbaycandakı səfirliyindən bazar ertəsi Trend -a bildiriblər.
Xəzər, Qara və Baltik dənizləri regionlarında enerji təhlükəsizliyi məsələləri üzrə IV sammit noyabrın 13-14-də Bakıda keçiriləcək.
Bu sammitdə həmçinin Polşa, Türkiyə, Ukrayna, Litva, Estoniya, Latviya, Rumıniya və Gürcüstan prezidentləri iştirak edəcəklər.
Enerji təhlükəsizliyi üzrə ilk sammit 2006-cı ilin mayında Krakovda, ikinci - ötən ilin oktyabrında Vilnüsdə, üçüncü - mayda Kiyevdə keçirilib.
Müəlliflə əlaqə saxlamaq üçün elektron ünvan: [email protected]
